యుద్ధంలో ఇరాన్ 'చౌక' వ్యూహం: రూ.16 లక్షల డ్రోన్‌ను కూల్చేందుకు రూ.33 కోట్ల క్షిపణిని వాడుతున్న అమెరికా!

అమెరికా, ఇరాన్ మధ్య ఉద్రిక్తతలు పెరుగుతున్న వేళ, ఓ ఆసక్తికరమైన 'క్షిపణుల లెక్క' అగ్రరాజ్యాన్ని తీవ్రంగా కలవరపరుస్తోంది. యుద్ధమంటే కేవలం ఆయుధాల శక్తి ప్రదర్శన మాత్రమే కాదని, దాని వెనుక పక్కా ఆర్థిక వ్యూహం కూడా ఉంటుందని తాజా పరిణామాలు స్పష్టం చేస్తున్నాయి. ఇరాన్ ప్రయోగిస్తున్న అత్యంత చౌకైన డ్రోన్లను అడ్డుకోవడానికి అమెరికా కోట్లాది రూపాయల విలువైన క్షిపణులను వాడాల్సి వస్తుండటం వ్యూహాత్మకంగా పెద్ద సవాలుగా మారింది.

ఇరాన్ ఉపయోగిస్తున్న 'షాహెద్' వంటి డ్రోన్ల తయారీకి సుమారు 20,000 డాలర్లు (రూ.16 లక్షలు) ఖర్చవుతుండగా, వాటిని గగనతలంలోనే కూల్చివేయడానికి అమెరికా వాడే ఒక్కో 'పేట్రియాట్' క్షిపణి ధర ఏకంగా 4 మిలియన్ డాలర్లు (దాదాపు రూ.33 కోట్లు). అంటే, ఒక డ్రోన్‌ను నాశనం చేయడానికి దాని విలువ కన్నా 200 రెట్లు ఎక్కువ ఖర్చు చేయాల్సి వస్తోంది. తక్కువ ఖర్చుతో ఎక్కువ నష్టం కలిగించాలన్నదే ఇరాన్ వ్యూహంగా కనిపిస్తోంది.

ఇరాన్ తన వద్ద ఉన్న వేలాది డ్రోన్లను దశలవారీగా ప్రయోగిస్తూ అమెరికా రక్షణ వ్యవస్థను ఆర్థికంగా దెబ్బతీయాలని చూస్తోంది. ఈ దాడుల వల్ల దుబాయ్, దోహా వంటి నగరాల్లోని కీలక మౌలిక సదుపాయాలు కూడా దెబ్బతింటున్నాయి. మరోవైపు, అమెరికా ఆయుధ నిల్వలు వేగంగా కరిగిపోతున్నాయని, యుద్ధం ఇదే రీతిలో మరో పది రోజులు కొనసాగితే క్షిపణుల కొరత ఏర్పడవచ్చని పెంటగాన్ వర్గాలు ఆందోళన చెందుతున్నాయి.

అధ్యక్షుడు డొనాల్డ్ ట్రంప్ ఈ ఆపరేషన్‌కు 'ఎపిక్ ఫ్యూరీ' అని పేరు పెట్టినా, క్షేత్రస్థాయిలో అమెరికాకు ఇది గట్టి సవాలు విసురుతోంది. భారీ ఆయుధాలు కలిగి ఉండటమే కాదు, వాటిని ఆర్థికంగా ఎంతకాలం మోయగలమనేదే ఇప్పుడు అగ్రరాజ్యం ముందున్న అసలైన పరీక్ష అని రక్షణ రంగ నిపుణులు విశ్లేషిస్తున్నారు.