కెప్టెన్ కుటుంబాన్ని టార్గెట్ చేయడం సిగ్గుచేటు: పాక్ పేసర్

టీ20 ప్రపంచకప్‌లో పాకిస్థాన్ జట్టు పేలవ ప్రదర్శన నేపథ్యంలో కెప్టెన్ సల్మాన్ అలీ ఆఘాపై తీవ్ర విమర్శలు వెల్లువెత్తుతున్నాయి. కొందరు అభిమానులు హద్దులు దాటి అతని కుటుంబాన్ని లక్ష్యంగా చేసుకోవడంపై ఆ జట్టు లెఫ్ట్ ఆర్మ్ పేసర్ సల్మాన్ మీర్జా తీవ్రంగా స్పందించాడు. ఇది చాలా సిగ్గుచేటైన చర్య అని, ఆటగాళ్ల కుటుంబాలను వివాదాల్లోకి లాగడం సరికాదని హితవు పలికాడు.

శ్రీలంకతో జరగనున్న కీలకమైన సూపర్ 8 మ్యాచ్‌కు ముందు మీర్జా మాట్లాడుతూ.. "ఒక ఆటగాడు మైదానంలో ఎప్పుడూ అత్యుత్తమ ప్రదర్శన ఇవ్వాలనే అనుకుంటాడు. ఏదో ఒక రోజు సరిగా ఆడకపోతే, వారి కుటుంబాలను లక్ష్యంగా చేసుకోవడం దారుణం. ఇలాంటివి అస్సలు జరగకూడదు" అని ఆవేదన వ్యక్తం చేశాడు. 

పాకిస్థాన్ సెమీస్ ఆశలు దాదాపు సంక్లిష్టంగా మారాయని, ఇప్పుడు తమ చేతుల్లో ఏమీ లేదని అంగీకరించాడు. ఇవాళ‌ శ్రీలంకపై భారీ తేడాతో గెలవడంతో పాటు ఇంగ్లండ్ కూడా తమకు అనుకూలంగా రాణిస్తేనే సెమీస్‌కు అవకాశం ఉంటుంది. అయినప్పటికీ తాము శ్రీలంకపై గెలిచి టోర్నీని సానుకూలంగా ముగించడంపైనే దృష్టి సారించామని మీర్జా వివరించాడు.

మరోవైపు ఇప్పటికే టోర్నీ నుంచి నిష్క్రమించిన శ్రీలంక జట్టు, ఈ మ్యాచ్‌లో గెలిచి గౌరవంగా తమ ప్రస్థానాన్ని ముగించాలని చూస్తోంది. ఆ జట్టు బౌలింగ్ కోచ్ రెనీ ఫెర్డినాండ్స్ మాట్లాడుతూ.. టోర్నీ ఆరంభంలోనే స్టార్ ఆల్‌రౌండర్ వనిందు హసరంగ గాయంతో దూరం కావడం తమను తీవ్రంగా దెబ్బతీసిందని అన్నారు. "హసరంగ లాంటి ప్రపంచ స్థాయి ఆటగాడిని కోల్పోతే ఏ జట్టుకైనా సవాళ్లు తప్పవు. అతని స్థానాన్ని భర్తీ చేయడం అసాధ్యం. మీకు ఇద్దరు హసరంగలు దొరకరు" అని ఆయన వ్యాఖ్యానించారు. టోర్నీలో తమ ప్రణాళికలు ఫలించకపోయినా, పాకిస్థాన్‌పై గెలిచేందుకే బరిలోకి దిగుతామని స్పష్టం చేశారు. దీంతో ఒక జట్టు సెమీస్ ఆశల కోసం, మరో జట్టు పరువు కోసం తలపడనుండటంతో ఈ మ్యాచ్ ఆసక్తికరంగా మారింది.