ఈ ఘటనలను వైసీపీ ఖండించకపోవడం ఆశ్చర్యం కలిగిస్తోంది: ఎంపీ లావు శ్రీకృష్ణదేవరాయలు

ఢిల్లీలో జరుగుతున్న గ్లోబల్ ఏఐ సమ్మిట్ లో యూత్ కాంగ్రెస్ కార్యకర్తలు చొక్కాలు విప్పి నిరసన తెలిపిన నేపథ్యంలో నరసరావుపేట టీడీపీ ఎంపీ లావు శ్రీకృష్ణదేవరాయలు కాంగ్రెస్ పార్టీపై తీవ్రస్థాయిలో విమర్శలు గుప్పించారు. గ్లోబల్ ఏఐ సమ్మిట్‌లో కాంగ్రెస్ నాయకుల ప్రవర్తన దేశ ప్రతిష్ఠను దిగజార్చేలా ఉందని ఆయన ఆరోపించారు. ప్రపంచ టెక్ దిగ్గజాలు, నాయకులు హాజరైన కీలక సదస్సులో రాహుల్ గాంధీ ఆధ్వర్యంలో కాంగ్రెస్ నేతలు అవమానకరంగా ప్రవర్తించారని, ఇది భారత్‌ను అంతర్జాతీయ వేదికపై నవ్వులపాలు చేసిందని ఆయన ఒక ప్రకటనలో పేర్కొన్నారు.

దేశ ప్రయోజనాల కంటే కాంగ్రెస్‌కు స్వార్థ రాజకీయాలే ముఖ్యమని లావు విమర్శించారు. భారత్ అభివృద్ధి చెందకూడదు, యువతకు ఉద్యోగాలు రాకూడదు అనే దురుద్దేశంతోనే కాంగ్రెస్ వ్యవహరిస్తోందని ఆరోపించారు. ఈ ఘటనలను వైసీపీ ఖండించకపోవడం ఆశ్చర్యం కలిగిస్తోందని అన్నారు. దేశ ప్రయోజనాల విషయంలో 'తల్లి కాంగ్రెస్-పిల్ల కాంగ్రెస్'ల వైఖరి ఒకటేనని ఆయన ఎద్దేవా చేశారు.

కాంగ్రెస్ పార్టీ వెంటనే దేశ ప్రజలకు, ప్రపంచానికి బహిరంగ క్షమాపణ చెప్పాలని, ఈ చర్యలకు పాల్పడిన వారిపై కఠిన చర్యలు తీసుకోవాలని లావు శ్రీకృష్ణదేవరాయలు డిమాండ్ చేశారు. రాజకీయాలు దేశ ప్రతిష్ఠకు అతీతంగా ఉండాలని హితవు పలికారు. ఇలాంటి అడ్డంకులు ఎదురైనా భారత్ ప్రగతి ఆగదని, దేశ గౌరవాన్ని అవమానించేవారిని ప్రజలు క్షమించరని ఆయన తన ప్రకటనలో స్పష్టం చేశారు.