వాషింగ్టన్ మేయర్ రేసులో భారత సంతతి మహిళ.. ఎవరీ రిని సంపత్?

అమెరికా రాజకీయాల్లో భారత సంతతికి చెందిన మరో మహిళ కీలక ముందడుగు వేశారు. దేశ రాజధాని వాషింగ్టన్ డీసీ మేయర్ పదవికి జరిగే ఎన్నికల్లో పోటీ చేయనున్నట్లు తమిళనాడు మూలాలున్న రిని సంపత్ (31) బుధవారం ప్రకటించారు. డెమొక్రటిక్ పార్టీ ప్రైమరీలో అభ్యర్థిగా బరిలోకి దిగుతున్న ఆమె.. నగరంలో మౌలిక వసతులను సరిదిద్దడం, పాలనపై ప్రజలకు నమ్మకం కలిగించడమే తన ప్రధాన లక్ష్యమని స్పష్టం చేశారు.

ప్రభుత్వ కాంట్రాక్టర్‌గా పనిచేస్తున్న రిని సంపత్, తన ప్రచారాన్ని ప్రస్తుత నగర నాయకత్వంపై విమర్శలతో ప్రారంభించారు. "మేయర్‌గా, నగర పాలనలో కనీస హామీలను నిలబెట్టడమే నా ప్రాధాన్యత. రోడ్లపై గుంతలు పూడ్చడం, మురుగునీటి సమస్యను పరిష్కరించడం, ధరలు తగ్గించడం, 911 కాల్స్ వెయిటింగ్ టైమ్ తగ్గించడం వంటివి చేస్తాను" అని ఆమె తెలిపారు. తన ఉద్యోగంలో ప్రాథమిక విధులు నిర్వర్తించడంలో విఫలమైన వారికి ప్రమోషన్ ఎందుకు ఇవ్వాలని ప్రశ్నిస్తూ, నగర కౌన్సిల్‌లో ఏళ్లుగా పనిచేస్తున్న రాజకీయ నాయకులను ఆమె పరోక్షంగా విమర్శించారు.

ఇటీవల కురిసిన మంచు తుపాను సమయంలో రోడ్లు, ఫుట్‌పాత్‌లు ప్రమాదకరంగా మారాయని, చెత్త పేరుకుపోయిందని, పాత నీటి పైపులైన్లు పగిలిపోయాయని ఆమె గుర్తుచేశారు. ఈ సమస్యల వల్ల ప్రజలు పనులకు వెళ్లలేక ఆదాయం కోల్పోయారని, వ్యాపారాలు కూడా నష్టపోయాయని తన ప్రచార వీడియోలో పేర్కొన్నారు. "నేను రాజకీయ నాయకురాలిని కాదు. నాకు ఎలాంటి ప్రత్యేక ప్రయోజన బృందాల మద్దతు లేదు. ప్రభుత్వ సేవలను మెరుగుపరచడమే నా వృత్తి" అని ఆమె అన్నారు.

తమిళనాడులోని తేనిలో జన్మించిన రిని, ఏడేళ్ల వయసులో కుటుంబంతో కలిసి అమెరికాకు వలస వెళ్లారు. పబ్లిక్ సర్వీస్‌లోకి రావడానికి తన తాతయ్యే స్ఫూర్తి అని, తమ కుటుంబం మెరుగైన జీవితం కోసం తన తండ్రి తీసుకున్న సాహసోపేత నిర్ణయం ఎంతో ప్రేరణనిచ్చిందని ఆమె వివరించారు. తన ప్రజాసేవకు తన కుటుంబ నేపథ్యమే స్ఫూర్తి అని రిని ఉద్ఘాటించారు. 

"మా తాత నాకు ఎప్పుడూ స్ఫూర్తిదాయకంగా ఉంటారు. ఆయన ఏడో తరగతి, మా అమ్మమ్మ ఒకటో తరగతి మాత్రమే చదువుకున్నారు. అలాంటి నేపథ్యం నుంచి వచ్చిన నేను అమెరికా రాజధానిలో జీవించడం, ఈ గొప్ప జీవితాన్ని అనుభవించడం నాకు చాలా గొప్ప విషయం" అని తెలిపారు. మెరుగైన జీవితం కోసం తమను అమెరికాకు తీసుకురావడానికి తన తండ్రి ఎంతో రిస్క్ తీసుకున్నారని, ఆయనే తనకు ఆదర్శమని చెప్పారు. తమిళం తన మాతృభాష అని తెలిపిన రిని, ఇప్పటికే తన ప్రచారానికి 15,000 డాలర్లకు పైగా నిధులను సమీకరించారు. వాషింగ్టన్ డీసీలో డెమొక్రటిక్ పార్టీకి బలమైన ఓటు బ్యాంకు ఉండటంతో, ఆ పార్టీ ప్రైమరీలో గెలుపే మేయర్ పదవికి కీలకం కానుంది.