భారత్, పాక్ జట్ల మధ్య చాలా తేడా కనిపిస్తోంది: గంగూలీ

టీ20 ప్రపంచకప్‌లో భాగంగా దాయాది పాకిస్థాన్‌పై భారత జట్టు 61 పరుగుల తేడాతో ఘన విజయం సాధించి, సూపర్-8లో తమ స్థానాన్ని ఖరారు చేసుకుంది. అయితే, ఒకప్పుడు ప్రపంచ క్రికెట్‌లో ఎంతో ఆసక్తి రేకెత్తించిన భారత్-పాకిస్థాన్ మ్యాచ్‌లో ఇప్పుడు ఆ పస లేదని, ఒకప్పటి తీవ్రత పూర్తిగా కనుమరుగైందని భారత క్రికెట్ జట్టు మాజీ కెప్టెన్ సౌరవ్ గంగూలీ సంచలన వ్యాఖ్యలు చేశాడు. ఈ మ్యాచ్‌ను 'పెద్ద మ్యాచ్'గా పరిగణించడం కూడా సరికాదని ఆయన అభిప్రాయపడ్డాడు.

ఈ గ్రూప్-ఎ మ్యాచ్‌లో తొలుత బ్యాటింగ్ చేసిన భారత్, ఓపెనర్ ఇషాన్ కిషన్ (77) మెరుపు ఇన్నింగ్స్ ఫలితంగా 176 పరుగుల లక్ష్యాన్ని నిర్దేశించింది. అనంతరం భారత బౌలర్లు కట్టుదిట్టంగా బౌలింగ్ చేయడంతో పాకిస్థాన్ 18 ఓవర్లలో 114 పరుగులకే కుప్పకూలింది.

ఈ మ్యాచ్ అనంతరం మాట్లాడుతూ గంగూలీ తన విశ్లేషణను పంచుకున్నాడు. "ఒకప్పుడు భారత్-పాకిస్థాన్ మ్యాచ్ అంటే ఉండే ఆసక్తి, తీవ్రత ఇప్పుడు కనిపించడం లేదు. దాన్ని పెద్ద మ్యాచ్ అనడం సరికాదు" అని గంగూలీ పేర్కొన్నాడు. "జావేద్ మియాందాద్, వసీం అక్రమ్ లాంటి దిగ్గజాలున్న పాకిస్థాన్ జట్టును పెద్ద జట్టు అనొచ్చు. కానీ ఇప్పటి జుట్టును పొరపాటున కూడా అలా భావించలేం" అని స్పష్టం చేశాడు.

"నా దృష్టిలో అసలైన పెద్ద మ్యాచ్‌లంటే భారత్-ఆస్ట్రేలియా, భారత్-దక్షిణాఫ్రికా, భారత్-ఇంగ్లండ్ మధ్య జరిగేవే. ప్రస్తుతం భారత్, పాకిస్థాన్ జట్ల మధ్య నాణ్యతలో భారీ వ్యత్యాసం కనిపిస్తోంది. ఈ ఫలితం ఊహించిందే" అని గంగూలీ వివరించాడు. 

ఈ విజయంతో భారత్ ఇప్పటికే సూపర్-8 దశకు అర్హత సాధించగా, పాకిస్థాన్ మాత్రం తమ చివరి గ్రూప్ మ్యాచ్‌లో నమీబియాపై తప్పక గెలవాల్సిన పరిస్థితిలో ఉంది. టీమిండియా తమ లీగ్ దశ చివరి మ్యాచ్‌ను ఫిబ్రవరి 18న అహ్మదాబాద్‌లోని నరేంద్ర మోదీ స్టేడియంలో నెదర్లాండ్స్‌తో ఆడనుంది.

టీ20 ప్రపంచకప్‌లలో ఇరు జట్ల మధ్య జరిగిన మ్యాచ్‌లలో భారత్ 8-1 ఆధిక్యంలో ఉండటం గమనార్హం. పాకిస్థాన్ కేవలం 2021లో ఒక్కసారి మాత్రమే గెలిచింది.