నోబెల్ గ్రహీతకు జైలు శిక్ష విధించిన ఇరాన్

 ఇరాన్‌లో మహిళల హక్కులు, మానవ హక్కుల కోసం నిరంతరం పోరాడుతున్న ప్రముఖ కార్యకర్త, 2023 నోబెల్ శాంతి బహుమతి గ్రహీత నర్గిస్ మొహమ్మదీకి మరోసారి ఎదురుదెబ్బ తగిలింది. అక్కడి న్యాయస్థానం ఆమెకు 6 సంవత్సరాల జైలు శిక్ష విధించింది. ప్రభుత్వానికి వ్యతిరేకంగా ప్రచారం చేశారన్న ఆరోపణలపై ఈ తీర్పు వెలువరించింది.

ఆమె న్యాయవాది మొస్తఫా నిలి ఈ వివరాలు వెల్లడించారు. నేరాలు చేయడానికి సమూహంగా ఏర్పడ్డారన్న అభియోగంపై ఆరేళ్ల జైలు శిక్ష విధించారని తెలిపారు. దీనితో పాటు ప్రభుత్వ వ్యతిరేక ప్రచార కార్యకలాపాలకు సంబంధించి మరో ఒకటిన్నర సంవత్సరాల శిక్ష కూడా పడింది. అయితే, ఇరాన్ చట్టాల ప్రకారం ఈ శిక్షలన్నీ ఏకకాలంలో అమలవుతాయి. శిక్షాకాలం పూర్తయ్యాక రెండేళ్ల పాటు దేశం విడిచి వెళ్లరాదని, మరో రెండేళ్ల పాటు సౌత్ ఖొరాసాన్‌లోని ఖోస్ఫ్ నగరంలో బహిష్కరణ శిక్ష అనుభవించాలని కోర్టు ఆదేశించింది.

53 ఏళ్ల నర్గిస్ మొహమ్మదీ గత 25 ఏళ్లుగా ఇరాన్‌లో మరణశిక్షకు, మహిళలపై తప్పనిసరి హిజాబ్ నిబంధనకు వ్యతిరేకంగా బలమైన గళం వినిపిస్తున్నారు. ఈ క్రమంలో ఆమె తన జీవితంలో ఎక్కువ భాగం జైలులోనే గడిపారు. జైలులో ఉండగానే గత ఏడాది ఆమె ప్రతిష్ఠాత్మక నోబెల్ శాంతి బహుమతికి ఎంపికయ్యారు. ఆమె తరఫున, పారిస్‌లో ఉంటున్న ఆమె కవల పిల్లలు ఈ పురస్కారాన్ని అందుకున్నారు.

అనారోగ్య కారణాలతో గత డిసెంబర్‌లో మూడు వారాల పాటు తాత్కాలికంగా విడుదలైన ఆమెను, తర్వాత మళ్లీ అరెస్టు చేశారు. తాజా తీర్పు ఇంకా తుది కాదని, దీనిపై అప్పీల్ చేస్తామని ఆమె న్యాయవాది తెలిపారు. నర్గిస్ ఆరోగ్య పరిస్థితి దృష్ట్యా ఆమెకు బెయిల్ లభిస్తుందని ఆశిస్తున్నట్లు పేర్కొన్నారు.