రోహిత్ ఫామ్‌లోనే ఉన్నాడు.. కానీ..: కెప్టెన్ గిల్ కీలక వ్యాఖ్యలు

న్యూజిలాండ్‌తో జరిగిన వన్డే సిరీస్‌లో బ్యాట్స్‌మన్‌గా నిరాశపరిచిన సీనియర్ ఆటగాడు రోహిత్ శర్మకు టీమిండియా కెప్టెన్ శుభ్‌మన్ గిల్ మద్దతుగా నిలిచాడు. రోహిత్ అద్భుతమైన ఫామ్‌లోనే ఉన్నాడని, అయితే లభించిన మంచి ఆరంభాలను భారీ స్కోర్లుగా మార్చడంలో విఫలమయ్యాడని పేర్కొన్నాడు. కివీస్‌తో జరిగిన మూడు వన్డేల సిరీస్‌ను భారత్ 1-2 తేడాతో కోల్పోయిన విషయం తెలిసిందే. భారత గడ్డపై న్యూజిలాండ్‌కు ఇదే తొలి వన్డే సిరీస్ విజయం కావడం గమనార్హం.

నిన్న ఇండోర్‌లోని హోల్కర్ క్రికెట్ స్టేడియంలో జరిగిన చివరి వన్డేలో 338 పరుగుల భారీ లక్ష్య ఛేదనలో రోహిత్ శర్మ 13 బంతుల్లో 11 పరుగులు చేసి నిరాశపరిచాడు. ఈ సిరీస్‌ మొత్తంలో మూడు ఇన్నింగ్స్‌లలో కలిపి 20.33 సగటుతో కేవలం 61 పరుగులు మాత్రమే చేసిన రోహిత్, ఒక్క అర్ధశతకం కూడా నమోదు చేయలేకపోయాడు.

మ్యాచ్ అనంతరం జరిగిన మీడియా సమావేశంలో గిల్ మాట్లాడుతూ.. "రోహిత్ శర్మ అద్భుతమైన ఫామ్‌లో ఉన్నాడని నేను భావిస్తున్నాను. ఆస్ట్రేలియా, దక్షిణాఫ్రికా సిరీస్‌ల నుంచి కూడా అతను మంచి టచ్‌లో ఉన్నాడు. అయితే, వచ్చిన మంచి ఆరంభాలను ప్రతీసారి భారీ స్కోర్లుగా మలచడం సాధ్యం కాదు. ఈ న్యూజిలాండ్ సిరీస్‌లోనూ రోహిత్‌కు కొన్ని మంచి ఆరంభాలు లభించాయి" అని తెలిపాడు.

"ఒక బ్యాట్స్‌మన్‌గా, వచ్చిన అవకాశాలను సద్వినియోగం చేసుకొని సెంచరీలుగా మార్చాలని ఎప్పుడూ ప్రయత్నిస్తాం. కానీ, అది ప్రతిసారీ సాధ్యం కాదు. అయినప్పటికీ, దానికోసమే మేం నిరంతరం శ్రమిస్తాం" అని గిల్ వివరించాడు. రోహిత్ త్వరలోనే మళ్లీ భారీ స్కోర్లు సాధిస్తాడనే నమ్మకాన్ని గిల్ తన మాటల ద్వారా వ్యక్తం చేశాడు.