డీఎస్పీ సర్‌తో తొలి మీటింగే 8 గంటలు.. 'ఎల్లమ్మ'పై వేణు యెల్దండి ఆసక్తికర పోస్ట్!

ప్రముఖ సంగీత దర్శకుడు దేవి శ్రీ ప్రసాద్ (డీఎస్పీ) హీరోగా అరంగేట్రం చేస్తున్న చిత్రం 'ఎల్ల‌మ్మ‌'. 'బలగం' ఫేమ్ వేణు యెల్దండి దర్శకత్వం వహిస్తున్న ఈ సినిమా కోసం తొలిసారి డీఎస్పీతో జరిపిన కథాచర్చ ఏకంగా 8 గంటల పాటు సాగిందని దర్శకుడు స్వయంగా వెల్లడించారు. ఈ విషయం ప్రస్తుతం సినీ వర్గాల్లో ఆసక్తిని రేకెత్తిస్తోంది.

డీఎస్పీతో కలిసి ఉన్న ఒక ఫొటోను తన సోషల్ మీడియా ఖాతాలో పంచుకున్న వేణు యెల్దండి.. "డీఎస్పీ సర్‌తో మొదటి మీటింగ్.. ఇది 8 గంటల సుదీర్ఘ చర్చ" అని క్యాప్షన్ ఇచ్చారు. సినిమాపై వారు ఎంత శ్రద్ధ పెడుతున్నారో ఈ ఒక్క పోస్ట్‌తో అర్థమవుతోందని నెటిజన్లు కామెంట్స్ చేస్తున్నారు.

మరోవైపు తన నటన అరంగేట్రంపై డీఎస్పీ కూడా ఇటీవల భావోద్వేగంగా స్పందించారు. "అప్పుడు 'దేవి' ఆశీస్సులతో నా సంగీత ప్రస్థానం మొదలైంది. ఇప్పుడు 'ఎల్ల‌మ్మ‌' దీవెనలతో నటుడిగా కొత్త ప్రయాణం ఆరంభిస్తున్నాను. మీరంతా మరింత ప్రేమను అందిస్తారని ఆశిస్తున్నాను" అని పేర్కొన్నారు. తనపై నమ్మకం ఉంచిన నిర్మాత దిల్ రాజు, దర్శకుడు వేణు యెల్దండికి ఆయన కృతజ్ఞతలు తెలిపారు.

ఇటీవల విడుదలైన 'ఎల్ల‌మ్మ‌' గ్లింప్స్ వీడియోకు మంచి స్పందన లభించింది. "ఇది విశ్వాసం. ఇది సంప్రదాయం. మట్టిలోంచి పుట్టిన ప్రతిఘటన" అనే ట్యాగ్‌లైన్‌తో సినిమాపై అంచనాలను పెంచారు. ఈ చిత్రంలో డీఎస్పీ 'పర్శీ' అనే పాత్రలో కనిపించనున్నారు. శ్రీ వెంకటేశ్వర క్రియేషన్స్ బ్యానర్‌పై శిరీష్‌ నిర్మిస్తున్న ఈ చిత్రానికి దిల్ రాజు సమర్పకుడిగా వ్యవహరిస్తున్నారు. ఆచార్య వేణు సినిమాటోగ్రఫీ అందిస్తుండగా, డీఎస్పీనే సంగీతం అందిస్తున్నారు.