ఎన్ఐఏ నూతన డైరెక్టర్ జనరల్‌గా రాకేశ్ అగర్వాల్

జాతీయ దర్యాప్తు సంస్థ (ఎన్ఐఏ) నూతన డైరెక్టర్ జనరల్‌గా సీనియర్ ఐపీఎస్ అధికారి రాకేశ్ అగర్వాల్ నియమితులయ్యారు. ఆయన 2028 ఆగస్టు 31 వరకు ఈ పదవిలో కొనసాగనున్నారు. గతంలో ఆయన ఎన్ఐఏ స్పెషల్ డైరెక్టర్ జనరల్‌గా బాధ్యతలు నిర్వర్తించారు. హిమాచల్ ప్రదేశ్ కేడర్‌కు చెందిన రాకేశ్ అగర్వాల్ 1994 బ్యాచ్‌కు చెందిన ఐపీఎస్ అధికారి. ఆయన మెకానికల్ ఇంజినీరింగ్‌లో బ్యాచిలర్ డిగ్రీని, ఆ తర్వాత మేనేజ్‌మెంట్‌లో మాస్టర్స్ డిగ్రీని పూర్తి చేశారు.

ప్రధానమంత్రి నరేంద్ర మోదీ అధ్యక్షతన జరిగిన నియామకాల కమిటీ ఆఫ్ ది క్యాబినెట్ (ఏసీసీ) ఈ నియామకాన్ని ఆమోదించింది. రాకేశ్ అగర్వాల్‌కు ఎన్ఐఏతో సుదీర్ఘ అనుబంధం ఉంది. ఆయన తన మూడు దశాబ్దాల పరిపాలన అనుభవంలో అనేక ముఖ్యమైన పదవులను నిర్వర్తించారు. సంక్లిష్టమైన ఘటనల దర్యాప్తులను నిర్వహించడంలో ఆయనకు ఉన్న అనుభవమే ఈ నియామకానికి ప్రధాన కారణమని తెలుస్తోంది.