బెంగళూరులోనూ ఏఎంబీ సినిమాస్... ప్రారంభోత్సవ తేదీ ప్రకటించిన మహేశ్ బాబు

టాలీవుడ్ సూపర్ స్టార్ మహేశ్ బాబు వ్యాపార రంగంలో మరో కీలక ముందడుగు వేశారు. హైదరాబాద్‌లో అత్యంత విజయవంతంగా నడుస్తున్న ఏఎంబీ (ఏషియన్ మహేశ్ బాబు) సినిమాస్ మల్టీప్లెక్స్‌ను ఇప్పుడు బెంగళూరుకు విస్తరించారు. జనవరి 16న బెంగళూరులో ఏఎంబీ సినిమాస్ అధికారికంగా ప్రారంభం కానుందని మహేశ్ బాబు స్వయంగా ప్రకటించారు. దక్షిణ భారతదేశంలోనే మొట్టమొదటి 'డాల్బీ సినిమా' ఎక్స్‌పీరియన్స్‌ను ఈ మల్టీప్లెక్స్ అందించనుండటం విశేషం.

ఈ విషయాన్ని మహేశ్ బాబు తన సోషల్ మీడియా ఖాతా ద్వారా అభిమానులతో పంచుకున్నారు. "జనవరి 16న బెంగళూరులో ఏఎంబీ సినిమాస్ తలుపులు అధికారికంగా తెరుచుకోనున్నాయి సౌత్ ఇండియాలోనే తొలి డాల్బీ సినిమా అనుభూతిని ఇక్కడ అందించబోతున్నాం. దీనిని సాకారం చేసేందుకు అసాధారణమైన కృషి చేసిన టీమ్ ఏఎంబీకి నా అభినందనలు. త్వరలోనే 'నమ్మ బెంగళూరు'లో అందరినీ కలుస్తాను" అని తన పోస్టులో పేర్కొన్నారు.

హైదరాబాద్‌లోని గచ్చిబౌలిలో ఏషియన్ సినిమాస్‌తో కలిసి మహేశ్ బాబు ఏర్పాటు చేసిన ఏఎంబీ సినిమాస్, అత్యుత్తమ థియేటర్ అనుభూతికి చిరునామాగా నిలిచింది. ఇప్పుడు బెంగళూరులోనూ అదే స్థాయిలో ప్రపంచస్థాయి సినిమా వీక్షణ అనుభూతిని అందించేందుకు సిద్ధమవ్వడంతో అక్కడి సినీ ప్రియులు ఆసక్తిగా ఎదురుచూస్తున్నారు.