మరో తమిళ దర్శకుడితో అల్లు అర్జున్ సినిమా... అధికారిక ప్రకటన వచ్చేసింది!

ఐకాన్ స్టార్ అల్లు అర్జున్, తమిళ సంచలన దర్శకుడు లోకేశ్ కనగరాజ్ కాంబినేషన్‌లో ఓ భారీ చిత్రం అధికారికంగా ఖరారైంది. ఎప్పటినుంచో ఊహాగానాల రూపంలో ఉన్న ఈ ప్రాజెక్ట్‌ను మైత్రీ మూవీ మేకర్స్ నిర్మిస్తున్నట్లు బుధవారం భోగి పండుగ సందర్భంగా ప్రకటించారు. #AA23 అనే వర్కింగ్ టైటిల్‌తో ఓ స్పెషల్ వీడియో ద్వారా ఈ ప్రకటన విడుదల చేయడంతో అభిమానుల్లో ఉత్సాహం నెలకొంది.

ఈ క్రేజీ ప్రాజెక్ట్‌కు యువ సంగీత సంచలనం అనిరుధ్ రవిచంద్రన్ స్వరాలు సమకూర్చనున్నారు. పాన్ ఇండియా స్థాయిలో యాక్షన్ డ్రామాగా ఈ సినిమాను తెరకెక్కించనున్నట్లు చిత్రబృందం వెల్లడించింది. 2026 ద్వితీయార్ధంలో ఈ సినిమా రెగ్యులర్ షూటింగ్ ప్రారంభం కానుందని సమాచారం. కథ ఇప్పటికే ఖరారైందని, స్క్రిప్ట్ పనులు మొదలయ్యాయని తెలుస్తోంది.

ఇప్పటికే అల్లు అర్జున్, తమిళ దర్శకుడు అట్లీతో ఓ సైన్స్ ఫిక్షన్ చిత్రంలో నటిస్తున్నారు. #AA22xA6 అనే వర్కింగ్ టైటిల్‌తో రూపొందుతున్న ఈ సినిమాలో దీపికా పదుకొణె, జాన్వీ కపూర్ కథానాయికలు. ఈ సినిమా చిత్రీకరణ పూర్తయ్యాక బన్నీ కొంత విరామం తీసుకుని లోకేశ్ కనగరాజ్ సినిమా సెట్స్‌లో అడుగుపెడతారు.

గతంలో లోకేశ్ కనగరాజ్ హైదరాబాద్‌ వచ్చి అల్లు అర్జున్‌కు కథ వినిపించడంతో ఈ కాంబినేషన్‌పై అంచనాలు మొదలయ్యాయి. అయితే లోకేశ్ తన సినిమాటిక్ యూనివర్స్ (LCU)లో భాగంగా ‘ఖైదీ 2’ చేస్తారని ప్రచారం జరిగింది. తాజా ప్రకటనతో ఆ ప్రాజెక్ట్ ప్రస్తుతానికి పక్కకు వెళ్లినట్లేనని భావిస్తున్నారు. పుష్ప సిరీస్‌ను నిర్మించిన మైత్రీ మూవీ మేకర్స్ ఈ చిత్రాన్ని కూడా భారీ స్థాయిలో నిర్మించేందుకు సిద్ధమవుతోంది.