తెలంగాణలో మరో వ్యక్తిని బలిగొన్న చైనా మాంజా

సంక్రాంతి పండుగ వేళ తెలంగాణలో తీవ్ర విషాదం చోటుచేసుకుంది. నిషేధిత చైనా మాంజా ఓ వ్యక్తి ప్రాణాలను బలిగొంది. సంగారెడ్డి జిల్లాలో బుధవారం జరిగిన ఈ దుర్ఘటనలో ఉత్తరప్రదేశ్‌కు చెందిన అవిదేశ్ (35) అనే వ్యక్తి మృతి చెందాడు. పోలీసులు తెలిపిన వివరాల ప్రకారం, అవిదేశ్ మోటార్‌సైకిల్‌పై ప్రయాణిస్తుండగా గాలిపటం దారమైన చైనా మాంజా అతడి మెడకు చుట్టుకుంది. దీంతో గొంతుకు తీవ్రమైన గాయం కావడంతో అధిక రక్తస్రావమై అక్కడికక్కడే ప్రాణాలు కోల్పోయాడు. ఈ ఘటనపై పోలీసులు కేసు నమోదు చేసి దర్యాప్తు చేస్తున్నారు.

గత కొద్ది వారాలుగా హైదరాబాద్, శివారు ప్రాంతాల్లో ఇలాంటి ఘటనలు ఆందోళన కలిగిస్తున్నాయి. ఆదివారం రామాంతపూర్‌లో ఓ అసిస్టెంట్ సబ్-ఇన్‌స్పెక్టర్ (ఏఎస్సై) మెడకు మాంజా చుట్టుకుని తీవ్రంగా గాయపడ్డారు. ఆయనకు వైద్యులు 10 కుట్లు వేశారు. మంగళవారం మీర్‌పేటలో 70 ఏళ్ల వృద్ధురాలి కాలికి మాంజా చిక్కుకుని గాయాలయ్యాయి. 2024లో హైదరాబాద్‌లోనే మాంజా కారణంగా విశాఖపట్నంకు చెందిన ఆర్మీ జవాన్ కడితాల కోటేశ్వర్ రెడ్డి (30) మరణించిన ఘటన తెలిసిందే.

ఈ వరుస ప్రమాదాలపై తెలంగాణ రాష్ట్ర మానవ హక్కుల కమిషన్ (హెచ్‌ఆర్‌సీ) తీవ్రంగా స్పందించింది. ఇమ్మానేని రామారావు అనే న్యాయవాది దాఖలు చేసిన పిటిషన్‌పై విచారణ చేపట్టింది. నిషేధిత మాంజా అమ్మకాలను అరికట్టడంలో తీసుకుంటున్న చర్యలపై ఫిబ్రవరి 26లోగా సమగ్ర నివేదిక ఇవ్వాలని హైదరాబాద్ పోలీస్ కమిషనర్ వి.సి. సజ్జనార్‌ను ఆదేశించింది.

మరోవైపు, నగరంలో చైనా మాంజా విక్రయాలపై పోలీసులు ఉక్కుపాదం మోపుతున్నారు. గత నెల రోజుల్లో 132 కేసులు నమోదు చేసి, రూ. 1.68 కోట్ల విలువైన 8,376 మాంజా రీళ్లను స్వాధీనం చేసుకున్నారు. ఈ కేసుల్లో 200 మందిని అరెస్ట్ చేశారు. నిషేధిత మాంజాను అమ్మినా, కొనుగోలు చేసినా జైలు శిక్ష తప్పదని కమిషనర్ సజ్జనార్ గట్టిగా హెచ్చరించారు.