అదనంగా 5 నిమిషాల నిద్ర, 2 నిమిషాల నడకతో ఏడాది ఆయుష్షు: అధ్యయనం

మన జీవనశైలిలో చేసుకునే చిన్న చిన్న మార్పులు కూడా ఆయుష్షును గణనీయంగా పెంచుతాయని ఒక తాజా అధ్యయనం వెల్లడించింది. రోజుకు కేవలం ఐదు నిమిషాలు అదనంగా నిద్రపోవడం, రెండు నిమిషాల పాటు మెట్లు ఎక్కడం లేదా చురుగ్గా నడవడం వంటివి చేస్తే మన జీవితకాలానికి ఒక ఏడాది అదనంగా కలుస్తుందని పరిశోధకులు తెలిపారు. ముఖ్యంగా, అనారోగ్యకరమైన జీవనశైలి కలిగిన వారికి ఈ మార్పులు మరింత మేలు చేస్తాయని పేర్కొన్నారు.

ప్రఖ్యాత "ది లాన్సెట్ ఈ-క్లినికల్ మెడిసిన్" జర్నల్‌లో బుధవారం ప్రచురితమైన ఈ అధ్యయనం కోసం సుమారు 60,000 మందిని 8 ఏళ్ల పాటు పరిశీలించారు. రోజువారీ ఆహారంలో అర కప్పు కూరగాయలను అదనంగా చేర్చుకోవడం వల్ల కూడా ఇదే విధమైన ప్రయోజనం ఉంటుందని తేలింది. అయితే, రోజుకు 7-8 గంటల నిద్ర, 40 నిమిషాలకు పైగా వ్యాయామం, ఆరోగ్యకరమైన ఆహారం వంటి ఉత్తమ అలవాట్లు పాటిస్తే.. ఆయుష్షు 9 ఏళ్లకు పైగా పెరుగుతుందని, ఎక్కువ కాలం ఆరోగ్యంగా జీవించవచ్చని ఈ అధ్యయనం స్పష్టం చేసింది.

నిద్ర, వ్యాయామం, ఆహారం అనే మూడు అలవాట్లను కలిపి మెరుగుపర్చుకుంటే ఫలితం మరింత ఎక్కువగా ఉంటుందని పరిశోధకులు వివరించారు. ఉదాహరణకు, ఏడాది ఆయుష్షు పెంచుకోవడానికి కేవలం నిద్రపైనే ఆధారపడితే 25 నిమిషాల అదనపు నిద్ర అవసరం. అదే సమయంలో ఆహారం, వ్యాయామంలో కూడా చిన్న మార్పులు చేసుకుంటే, కేవలం 5 నిమిషాల అదనపు నిద్రతోనే ఆ ప్రయోజనం పొందవచ్చని తెలిపారు.

ఇదే తరహాలో "ది లాన్సెట్" జర్నల్‌లో ప్రచురితమైన మరో అధ్యయనం కూడా శారీరక శ్రమ ప్రాధాన్యాన్ని నొక్కి చెప్పింది. రోజుకు కేవలం 5 నిమిషాలు అదనంగా నడిస్తే, మరణాల ముప్పు 10 శాతం వరకు తగ్గుతుందని ఈ అధ్యయనం పేర్కొంది. అలాగే, రోజూ కూర్చునే సమయాన్ని 30 నిమిషాలు తగ్గించుకుంటే మొత్తం మరణాల ముప్పు 7 శాతం మేర తగ్గుతుందని అంచనా వేశారు. అయితే, ఈ ఫలితాలను వ్యక్తిగత సలహాలుగా కాకుండా, జనాభా మొత్తానికి కలిగే ప్రయోజనాల కోణంలో చూడాలని పరిశోధకులు స్పష్టం చేశారు.