అమీర్‌పేట కోచింగ్ సెంటర్‌లో అగ్నిప్రమాదం

హైదరాబాద్ నగరంలోని అమీర్‌పేట మైత్రీవనంలో ఉన్న ఓ కోచింగ్ సెంటర్‌లో ఈ ఉదయం భారీ అగ్నిప్రమాదం సంభవించింది. ఈ ఘటనలో విద్యార్థులందరూ సురక్షితంగా బయటపడటంతో పెను ప్రమాదం తప్పినట్లయింది. ఈ ప్రమాదంలో ఎవరికీ గాయాలు కాలేదని అధికారులు స్పష్టం చేశారు.

వివరాల్లోకి వెళితే... మైత్రీవనంలోని శివమ్ టెక్నాలజీస్ అనే కోచింగ్ సెంటర్‌లో ఉదయం 10 గంటల సమయంలో ఒక్కసారిగా మంటలు చెలరేగాయి. బ్యాటరీలు పేలడం వల్లే ఈ ప్రమాదం జరిగినట్లు ప్రాథమికంగా భావిస్తున్నారు. మంటలు, దట్టమైన పొగలు వ్యాపించడంతో విద్యార్థులు, సిబ్బంది తీవ్ర భయాందోళనలకు గురయ్యారు.

స్థానికుల నుంచి సమాచారం అందుకున్న వెంటనే అగ్నిమాపక సిబ్బంది, పోలీసులు హుటాహుటిన ఘటనా స్థలానికి చేరుకున్నారు. వెంటనే సహాయక చర్యలు చేపట్టి, సెంటర్‌లోని విద్యార్థులందరినీ సురక్షితంగా బయటకు తీసుకువచ్చారు. అనంతరం అగ్నిమాపక సిబ్బంది మంటలను పూర్తిగా అదుపులోకి తెచ్చారు. ఈ ఘటనతో ఆ ప్రాంతంలో కొంతసేపు ఉద్రిక్త వాతావరణం నెలకొంది.

వందలాది కోచింగ్ సెంటర్లకు నిలయమైన అమీర్‌పేటలో ఈ ప్రమాదం జరగడం ఆందోళనకు గురిచేసింది.