ప్రభాస్ 'రెబెల్ సాబ్' ప్రోమో ఇదిగో... రేపు ఫుల్ సాంగ్ రిలీజ్

పాన్ ఇండియా స్టార్ ప్రభాస్ అభిమానులు ఎంతో ఆసక్తిగా ఎదురుచూస్తున్న 'ది రాజా సాబ్' సినిమా నుంచి అదిరిపోయే అప్డేట్ వచ్చింది. ఈ చిత్రంలోని తొలి పాట 'రెబెల్ సాబ్' ప్రోమోను చిత్రబృందం శనివారం విడుదల చేసింది. పూర్తి పాటను ఆదివారం (రేపు) రాత్రి 8.11 గంటలకు విడుదల చేయనున్నట్టు ప్రకటించింది. ఈ వార్తతో ప్రభాస్ అభిమానులు సోషల్ మీడియాలో సందడి చేస్తున్నారు.

విడుదలైన ఈ ప్రోమోలో ప్రభాస్ ఎంట్రీ, ఆయన స్వాగ్ అభిమానులను విశేషంగా ఆకట్టుకుంటున్నాయి. సంగీత దర్శకుడు తమన్ అందించిన బీట్స్ పవర్‌ఫుల్‌గా ఉన్నాయి. మారుతి దర్శకత్వంలో ఈ సినిమా పూర్తిస్థాయి మాస్ ఎంటర్‌టైనర్‌గా తెరకెక్కుతున్నట్టు ఈ ప్రోమో చూస్తే స్పష్టమవుతోంది. "స్వేగ్ & ఎంట్రీ లెవెల్ పాన్ ఇండియా నెం.1" అంటూ మేకర్స్ ఈ ప్రోమోను పంచుకున్నారు.

పీపుల్ మీడియా ఫ్యాక్టరీ పతాకంపై టీజీ విశ్వప్రసాద్ ఈ చిత్రాన్ని భారీ బడ్జెట్‌తో నిర్మిస్తున్నారు. ఈ సినిమాలో ప్రభాస్ సరసన మాళవిక మోహనన్, నిధి అగర్వాల్ హీరోయిన్లుగా నటిస్తుండగా.. బాలీవుడ్ నటుడు సంజయ్ దత్, బోమన్ ఇరానీ కీలక పాత్రలు పోషిస్తున్నారు. ప్రస్తుతం ట్రెండింగ్‌లో ఉన్న ఈ సాంగ్ ప్రోమో, సినిమాపై అంచనాలను మరింత పెంచింది. 'ది రాజా సాబ్' చిత్రాన్ని 2026 జనవరి 9న ప్రపంచవ్యాప్తంగా థియేటర్లలో విడుదల చేసేందుకు సన్నాహాలు చేస్తున్నారు.