రెండో రోజూ లాభాల జోరు... ఐటీ, ఆటో షేర్ల దన్నుతో దూసుకెళ్లిన మార్కెట్లు

దేశీయ స్టాక్ మార్కెట్లు వరుసగా రెండో రోజు మంగళవారం కూడా లాభాలతో ముగిశాయి. ఐటీ, ఆటో, మెటల్, ఎఫ్‌ఎంసీజీ వంటి కీలక రంగాల్లో కొనుగోళ్ల మద్దతుతో పాటు, సానుకూల అంతర్జాతీయ పరిణామాలు సూచీలకు దన్నుగా నిలిచాయి. అమెరికాలో సుదీర్ఘ ఫెడరల్ షట్‌డౌన్‌కు ముగింపు పలికే బిల్లును అక్కడి సెనేట్ ఆమోదించడం ప్రపంచ మార్కెట్లలో ఉత్సాహాన్ని నింపింది.

ట్రేడింగ్ ముగిసే సమయానికి బీఎస్ఈ సెన్సెక్స్ 335.97 పాయింట్లు లాభపడి 83,871.32 వద్ద స్థిరపడింది. ఉదయం 83,671.52 వద్ద ట్రేడింగ్ ప్రారంభించిన సెన్సెక్స్, రోజంతా సానుకూలంగా కదిలింది. ఐటీ, ఆటో షేర్లలో నిరంతర కొనుగోళ్ల కారణంగా ఒక దశలో 83,936.47 వద్ద గరిష్ఠ స్థాయిని తాకింది. మరోవైపు, ఎన్‌ఎస్‌ఈ నిఫ్టీ 120 పాయింట్లు వృద్ధి చెంది 25,694.95 వద్ద ముగిసింది.

"ఢిల్లీ పేలుడు ఘటనకు సంబంధించిన ఆందోళనలతో దేశీయ మార్కెట్ మొదట కాస్త బలహీనంగా ప్రారంభమైంది. అయితే, అమెరికాలో షట్‌డౌన్‌ ముగింపు వంటి సానుకూల అంతర్జాతీయ సంకేతాలతో వెంటనే కోలుకుని, రోజు గరిష్ఠ స్థాయి వద్ద ముగిసింది" అని జియోజిత్ ఇన్వెస్ట్‌మెంట్స్ రీసెర్చ్ హెడ్ వినోద్ నాయర్ విశ్లేషించారు. రెండో త్రైమాసిక ఫలితాల సీజన్ దాదాపు ముగింపు దశకు చేరిందని, విస్తృత మార్కెట్ అంచనాలను మించి రాణించడంతో ఇది సానుకూలంగా ముగియనుందని ఆయన అభిప్రాయపడ్డారు.

సెన్సెక్స్ బాస్కెట్‌లో బీఈఎల్, అదానీ పోర్ట్స్, మహీంద్రా అండ్ మహీంద్రా, హెచ్‌సీఎల్ టెక్, భారతీ ఎయిర్‌టెల్, ఇన్ఫోసిస్, సన్ ఫార్మా, హిందుస్థాన్ యూనిలీవర్, ఎల్&టీ, టెక్ మహీంద్రా, టీసీఎస్ షేర్లు ప్రధానంగా లాభపడ్డాయి. బజాజ్ ఫైనాన్స్, బజాజ్ ఫిన్‌సర్వ్, టాటా మోటార్స్ పీవీ షేర్లు నష్టాలతో ముగిశాయి.

దాదాపు అన్ని రంగాల సూచీలు లాభాల్లోనే పయనించాయి. నిఫ్టీ ఐటీ 1.20%, నిఫ్టీ ఆటో 1.07%, నిఫ్టీ ఎఫ్‌ఎంసీజీ 0.34%, నిఫ్టీ బ్యాంక్ 0.35% చొప్పున లాభపడ్డాయి. అయితే, బ్రాడర్ మార్కెట్లలో మిశ్రమ స్పందన కనిపించింది. నిఫ్టీ మిడ్‌క్యాప్ 100 సూచీ 0.50% లాభపడగా, నిఫ్టీ స్మాల్‌క్యాప్ 100 సూచీ 0.21% నష్టపోయింది.