మేకప్ మేన్ మృతితో చలించిపోయిన అభిషేక్ బచ్చన్

బాలీవుడ్ నటుడు అభిషేక్ బచ్చన్ తీవ్ర విషాదంలో మునిగిపోయారు. తన వద్ద గత 27 ఏళ్లుగా మేకప్ ఆర్టిస్ట్‌గా పనిచేస్తున్న అశోక్ సావంత్ మృతి చెందడంతో ఆయన కన్నీటి పర్యంతమయ్యారు. అశోక్ సావంత్‌ను 'అశోక్ దాదా' అని ఆప్యాయంగా పిలుచుకునే అభిషేక్, ఆయనతో తనకున్న అనుబంధాన్ని గుర్తుచేసుకుంటూ సోషల్ మీడియాలో ఒక భావోద్వేగ పోస్ట్ పెట్టారు. అశోక్‌తో కలిసి ఉన్న రెండు ఫోటోలను కూడా పంచుకున్నారు.

"అశోక్ దాదా, నేను గత 27 ఏళ్లుగా కలిసి పనిచేశాం. నా తొలి సినిమా నుంచి ఆయనే నాకు మేకప్ చేస్తున్నారు. ఆయన కేవలం నా టీమ్‌లోని సభ్యుడు కాదు, నా కుటుంబంలో ఒకరు. ఆయన అన్నయ్య దీపక్ గారు మా నాన్న (అమితాబ్ బచ్చన్) దగ్గర దాదాపు 50 ఏళ్లుగా మేకప్ ఆర్టిస్ట్‌గా ఉన్నారు" అని అభిషేక్ తన పోస్ట్‌లో పేర్కొన్నారు.

గత కొంతకాలంగా అశోక్ సావంత్ అనారోగ్యంతో బాధపడుతున్నారని అభిషేక్ తెలిపారు. "గత రెండేళ్లుగా అనారోగ్యం కారణంగా ఆయన నాతో సెట్స్‌పైకి రాలేకపోయేవారు. కానీ నేను షూటింగ్‌లో ఉన్నప్పుడు ఒక్కరోజు కూడా నా గురించి తెలుసుకోకుండా ఉండేవారు కాదు. నా అసిస్టెంట్ నాకు సరిగ్గా మేకప్ చేస్తున్నాడా లేదా అని అడిగి తెలుసుకునేవారు. ఆయన చాలా ప్రేమగల, సున్నితమైన వ్యక్తి. ఎప్పుడూ నవ్వుతూ, ఆప్యాయంగా హత్తుకునేవారు. తన బ్యాగ్‌లో ఎప్పుడూ నమ్‌కీన్ చివ్డా లేదా భాకర్‌వాడీ వంటివి ఉంచుకునేవారు" అని గుర్తుచేసుకున్నారు.

అనారోగ్యంతో పోరాడుతూ అశోక్ సావంత్ గత రాత్రి కన్నుమూశారని అభిషేక్ ఆవేదన వ్యక్తం చేశారు. "ప్రతి కొత్త సినిమా ఫస్ట్ షాట్‌కు ముందు నేను మొట్టమొదట ఆయన పాదాలకు నమస్కరించి ఆశీర్వాదం తీసుకునేవాడిని. ఇకపై నేను ఆకాశం వైపు చూసి, ఆయన నన్ను అక్కడి నుంచి దీవిస్తున్నారని భావించుకోవాలి. దాదా, మీ ప్రేమకు, జాగ్రత్తకు, ప్రతిభకు, మీ చిరునవ్వుకు ధన్యవాదాలు. మీరు లేకుండా పనికి వెళ్లాలని ఆలోచిస్తుంటేనే గుండె పగిలిపోతోంది. మీ ఆత్మకు శాంతి కలగాలని ప్రార్థిస్తున్నాను. మళ్లీ కలిసే రోజు మీ ఆలింగనం కోసం ఎదురుచూస్తాను. ఓం శాంతి" అంటూ అభిషేక్ తన పోస్ట్‌ను ముగించారు.