యూఏఈలో సోదరుడి నిర్బంధం.. కన్నీటితో నటి సెలీనా జైట్లీ భావోద్వేగ పోస్ట్

ప్రముఖ నటి సెలీనా జైట్లీ తన సోదరుడు, రిటైర్డ్ మేజర్ విక్రాంత్ కుమార్ జైట్లీ గురించి సోషల్ మీడియాలో ఒక భావోద్వేగ పోస్ట్ పెట్టారు. ఆయన 2024 నుంచి యునైటెడ్ అరబ్ ఎమిరేట్స్ (యూఏఈ)లో నిర్బంధంలో ఉన్నారు. తన సోదరుడు సైనిక యూనిఫాంలో ఉన్న ఫోటోను పంచుకుంటూ సెలీనా తన ఆవేదనను వ్యక్తం చేశారు.

"డంపీ... నువ్వు క్షేమంగా ఉన్నావని ఆశిస్తున్నాను. నేను నీకు అండగా నిలబడ్డానని తెలుసుకో. నీ కోసం ఏడవకుండా ఒక్క రాత్రి కూడా నేను నిద్రపోలేదు. నీ కోసం నేను ఏమైనా వదులుకుంటాను. మన మధ్య ఎవరూ రాలేరని నమ్ముతున్నాను. నీ కోసం చేయని ప్రయత్నం లేదు. దేవుడు నీకు, నాకు దయ చూపిస్తాడని ఆశిస్తున్నాను. నీ రాక కోసం ఎదురుచూస్తున్నా భాయ్" అంటూ ఆమె ఎమోషనల్ అయ్యారు.

విక్రాంత్ కుమార్ జైట్లీ నిర్బంధంపై నాలుగు వారాల్లోగా స్టేటస్ రిపోర్ట్ ఫైల్ చేయాలని కేంద్ర ప్రభుత్వాన్ని ఢిల్లీ హైకోర్టు ఆదేశించిన కొన్ని రోజులకే సెలీనా ఈ పోస్ట్ పెట్టడం గమనార్హం. యూఏఈలో నిర్బంధంలో ఉన్న తన సోదరుడికి భారత ప్రభుత్వం తరపున అవసరమైన న్యాయ, వైద్య సహాయం అందించాలని కోరుతూ సెలీనా ఢిల్లీ హైకోర్టును ఆశ్రయించారు. ఈ కేసులో విక్రాంత్ కుమార్ పరిస్థితిని ఎప్పటికప్పుడు తెలుసుకునేందుకు ఒక నోడల్ ఆఫీసర్‌ను నియమించాలని కూడా కోర్టు ఆదేశించింది.

గత 14 నెలలుగా తన సోదరుడిని అబుదాబిలో అపహరించి, నిర్బంధించారని సెలీనా ఆరోపిస్తున్నారు. సరైన న్యాయ, వైద్య సహాయం కూడా అందించడం లేదని ఆమె తన పిటిషన్‌లో పేర్కొన్నారు. "నాలుగో తరం సైనికుడిగా, ఎన్నో యుద్ధాల్లో పాల్గొన్న వారి మనవడిగా దేశానికి తన యవ్వనాన్ని అంకితం చేసిన నా సోదరుడిని సురక్షితంగా వెనక్కి తీసుకురావడానికి భారత ప్రభుత్వం తప్పక పోరాడుతుందని నమ్ముతున్నాను" అని ఆమె గతంలో ఒక పోస్టులో పేర్కొన్నారు.

సెలీనా తరఫున న్యాయవాదులు రాఘవ్ కక్కర్, మాధవ్ అగర్వాల్ వాదనలు వినిపిస్తున్నారు. "నోడల్ ఆఫీసర్ నియామకం వల్ల పిటిషనర్, ఆమె సోదరుడి మధ్య కమ్యూనికేషన్ సులభతరం అవుతుంది. ఆయనకు న్యాయ సహాయం అందించడానికి, కేసు స్టేటస్ తెలుసుకోవడానికి ఇది ఉపయోగపడుతుంది. మా సోదరుడిని ఎందుకు నిర్బంధించారనే వివరాలు మాకు ఇంకా తెలియదు" అని అడ్వకేట్ రాఘవ్ కక్కర్ మీడియాకు తెలిపారు. ఈ కేసు తదుపరి విచారణ డిసెంబర్ 4న జరగనుంది.