టెక్ రంగంలో ఉద్యోగాల ఊచకోత... లక్ష దాటిన తొలగింపులు!

ప్రపంచవ్యాప్తంగా టెక్నాలజీ రంగంలో ఉద్యోగాల కోత ప్రకంపనలు సృష్టిస్తోంది. 2025 సంవత్సరంలో ఇప్పటివరకు 218 కంపెనీలు 1,12,700 మందికి పైగా ఉద్యోగులను తొలగించినట్లు అంతర్జాతీయ జాబ్ కట్స్ ట్రాకింగ్ వెబ్‌సైట్ `లేఆఫ్స్.ఎఫ్‌వైఐ` డేటా వెల్లడించింది. వృద్ధి మందగించడం, ఆర్టిఫిషియల్ ఇంటెలిజెన్స్ (ఏఐ) ఆధారిత ఆటోమేషన్‌ వైపు వేగంగా మళ్లుతుండటం వంటి కారణాలతో అమెజాన్, ఇంటెల్, టీసీఎస్, మైక్రోసాఫ్ట్, యాక్సెంచర్ వంటి దిగ్గజ సంస్థలు వేలాది ఉద్యోగాలకు మంగళం పాడుతున్నాయి. కరోనా మహమ్మారి సమయంలో అవసరానికి మించి నియామకాలు చేపట్టడం, మారుతున్న టెక్ ఆర్థిక వ్యవస్థకు అనుగుణంగా పునర్‌వ్యవస్థీకరించుకోవడం వంటివి ఈ భారీ తొలగింపులకు ప్రధాన కారణాలని కంపెనీలు పేర్కొంటున్నాయి.

అమెజాన్‌లో చరిత్రలోనే అతిపెద్ద కోత
ఈ-కామర్స్ దిగ్గజం అమెజాన్ తన చరిత్రలోనే అతిపెద్ద ఉద్యోగాల కోతకు సిద్ధమైంది. ఆపరేషన్స్, హెచ్‌ఆర్, డివైజెస్, ఏడబ్ల్యూఎస్ విభాగాల్లోని 14,000 కార్పొరేట్ ఉద్యోగాలు సహా మొత్తం 30,000 మందిని తొలగిస్తోంది. కంపెనీని 'ప్రపంచంలోనే అతిపెద్ద స్టార్టప్‌లా' నడపాలని లక్ష్యంగా పెట్టుకున్నామని, ఏఐపై భారీగా పెట్టుబడులు పెడుతున్నామని సీఈఓ ఆండీ జాస్సీ తెలిపారు.

ఇంటెల్, టీసీఎస్‌లోనూ భారీగా తొలగింపులు
ప్రముఖ చిప్‌మేకర్ ఇంటెల్ కూడా 24,000 ఉద్యోగాలను (మొత్తం సిబ్బందిలో 22 శాతం) తగ్గించుకోనుంది. పీసీలకు డిమాండ్ తగ్గడంతో ఎన్విడియా, ఏఎండీ వంటి పోటీదారులతో ఇబ్బందులు ఎదుర్కొంటున్న ఇంటెల్, ఖర్చులను తగ్గించుకునేందుకు ఈ నిర్ణయం తీసుకుంది.

భారత ఐటీ దిగ్గజం టాటా కన్సల్టెన్సీ సర్వీసెస్ (టీసీఎస్) సైతం తన చరిత్రలోనే అత్యంత భారీ ఉద్యోగాల కోతను ప్రకటించింది. సెప్టెంబర్ 2025తో ముగిసిన త్రైమాసికంలో 19,755 మందిని తొలగించింది. దీంతో కంపెనీ ఉద్యోగుల సంఖ్య 2022 తర్వాత మొదటిసారిగా 6 లక్షల దిగువకు చేరింది. ఏఐ ఆధారిత ఆటోమేషన్‌పై దృష్టి సారించడంతో మధ్య, ఉన్నత స్థాయి ఉద్యోగాల్లో కోతలు తప్పలేదని కంపెనీ సీహెచ్‌ఆర్‌ఓ సుదీప్ కున్నుమల్ వివరించారు.

ఏఐ కేంద్రంగా ఇతర సంస్థల పునర్‌వ్యవస్థీకరణ
యాక్సెంచర్, మైక్రోసాఫ్ట్, సేల్స్‌ఫోర్స్ వంటి సంస్థలు కూడా వేలాది మందిని తొలగించాయి. ఏఐ, క్లౌడ్ సేవలపై పెట్టుబడులను పెంచేందుకు మైక్రోసాఫ్ట్ 9,000 మందిని, కస్టమర్ సేవలను ఏఐ ఆటోమేట్ చేస్తుండటంతో సేల్స్‌ఫోర్స్ 4,000 మందిని తొలగించాయి. సిస్కో, గూగుల్, మెటా, ఒరాకిల్ వంటి కంపెనీలు కూడా ఏఐని కేంద్రంగా చేసుకుని పునర్‌వ్యవస్థీకరణలో భాగంగా ఉద్యోగులను తగ్గించాయి.

ఈ లేఆఫ్స్ ట్రెండ్ కేవలం టెక్ కంపెనీలకే పరిమితం కాలేదు. ఆటోమేషన్ కారణంగా యూపీఎస్ 48,000 మందిని, ఎలక్ట్రిక్ వాహనాలపై దృష్టి సారించిన ఫోర్డ్ 13,000 మందిని, పారామౌంట్ గ్లోబల్ 2,000 మంది ఉద్యోగులను తొలగించాయి. ఒకవైపు కంపెనీలు ఏఐ టూల్స్‌పై బిలియన్ల కొద్దీ డాలర్ల పెట్టుబడి పెడుతుండగా, మరోవైపు సంప్రదాయ ఉద్యోగాలను తగ్గించుకోవాల్సి వస్తుండటం టెక్ రంగంలో కొత్త సవాలుగా మారింది.