మధ్యప్రదేశ్‌లో ప్రాణాలు తీస్తున్న దగ్గుమందు.. 9కి పెరిగిన మృతుల సంఖ్య

సాధారణ జ్వరం, దగ్గుకు వాడిన మందే చిన్నారుల ప్రాణాలు తీస్తుండటం తీవ్ర ఆందోళన కలిగిస్తోంది. మధ్యప్రదేశ్‌లోని ఛింద్వాడా జిల్లాలో కలుషిత దగ్గు మందుల కారణంగా కేవలం పదిహేను రోజుల వ్యవధిలో ఏకంగా తొమ్మిది మంది చిన్నారులు కిడ్నీలు విఫలమై మరణించడం దేశవ్యాప్తంగా సంచలనం సృష్టిస్తోంది.

ఛింద్వాడా జిల్లాలో చోటుచేసుకున్న ఈ విషాద ఘటనలపై అధికారులు దర్యాప్తు ముమ్మరం చేశారు. సాధారణ జ్వరంగా ప్రారంభమైన అనారోగ్యం, ప్రాణాంతకంగా మారడంతో ఆరోగ్య శాఖ అప్రమత్తమైంది. ఇప్పటివరకు తొమ్మిది మంది చిన్నారులు మరణించినట్లు పరాసియా సబ్-డివిజనల్ మేజిస్ట్రేట్ శుభం యాదవ్ ధ్రువీకరించారు. మరణించిన చిన్నారులలో ఐదుగురు 'కోల్డ్‌రెఫ్' సిరప్, మరొకరు 'నెక్స్‌ట్రో' సిరప్ వాడినట్లు ప్రాథమిక విచారణలో తేలింది. దీంతో డెక్స్ట్రోమెథోర్ఫాన్ హైడ్రోబ్రోమైడ్ ఉన్న దగ్గు మందులే ఈ మరణాలకు కారణమని అధికారులు బలంగా అనుమానిస్తున్నారు.

ఈ ఘటనల నేపథ్యంలో ప్రభుత్వం తక్షణ చర్యలు చేపట్టింది. రాష్ట్రవ్యాప్తంగా అనుమానిత దగ్గు మందుల పంపిణీని నిలిపివేసి, వాటి నమూనాలను పరీక్షల కోసం పంపింది. ఇదే తరహాలో రాజస్థాన్‌లోని సికార్ జిల్లాలో కూడా ఒక చిన్నారి మృతి చెందడంతో, జాతీయ వ్యాధి నియంత్రణ కేంద్రం (ఎన్సీడీసీ) రంగంలోకి దిగింది. మధ్యప్రదేశ్, రాజస్థాన్‌లలోని ఆసుపత్రులు, ఇతర ప్రాంతాల నుంచి నీరు, మందుల నమూనాలను సేకరించి, అంటువ్యాధుల కోణంలో కూడా పరీక్షిస్తోంది.

ముందుజాగ్రత్త చర్యగా జ్వరం, జలుబు, ఫ్లూ లక్షణాలతో బాధపడుతున్న సుమారు 1,420 మంది చిన్నారులను అధికారులు నిశితంగా పర్యవేక్షిస్తున్నారు. రెండు రోజులకు మించి అనారోగ్యంతో ఉన్న పిల్లలను సివిల్ ఆసుపత్రిలో ఆరు గంటల పాటు పరిశీలనలో ఉంచుతున్నారు. పరిస్థితి విషమిస్తే జిల్లా ఆసుపత్రికి తరలించి, కోలుకున్నాక ఆశా కార్యకర్తల పర్యవేక్షణలో ఉంచుతున్నారు. 

మరోవైపు, ప్రైవేటు వైద్యులు వైరల్ జ్వరాలకు చికిత్స చేయకుండా నేరుగా ప్రభుత్వ ఆసుపత్రులకు పంపాలని స్పష్టమైన ఆదేశాలు జారీ చేశారు. బాధితుల నుంచి సేకరించిన నీటి, దోమల సంబంధిత నమూనాల నివేదికలు నార్మల్‌గా రావడంతో, అనుమానాలన్నీ దగ్గు మందులవైపే మళ్లుతున్నాయి. రాజస్థాన్ ప్రభుత్వం ఇప్పటికే 19 బ్యాచ్‌ల దగ్గు సిరప్‌ల అమ్మకాలపై నిషేధం విధించింది.