భారత్-పాక్ క్రికెట్‌పై ఐపీఎల్ చైర్మన్ క్లారిటీ.. ప్రభుత్వ ఆదేశాలే ఫైనల్!

భారత్, పాకిస్థాన్ మధ్య క్రికెట్ మ్యాచ్‌లు ఎందుకు కేవలం ఐసీసీ, ఏసీసీ వంటి పెద్ద టోర్నమెంట్‌లకే పరిమితం అయ్యాయనే ప్రశ్నకు ఐపీఎల్ చైర్మన్ అరుణ్ ధుమాల్ స్పష్టత ఇచ్చారు. ఇది పూర్తిగా భారత ప్రభుత్వ విధానానికి అనుగుణంగా తీసుకున్న నిర్ణయమని, ఇందులో ఎలాంటి మార్పు ఉండబోదని ఆయన తేల్చిచెప్పారు.

ప్లే‌కామ్ బిజినెస్ ఆఫ్ స్పోర్ట్స్ సమ్మిట్ 2025లో పాల్గొన్న అరుణ్ ధుమాల్ ఈ కీలక వ్యాఖ్యలు చేశారు. ఆసియా కప్‌లో భాగంగా సెప్టెంబర్ 14న దుబాయ్‌ వేదికగా భారత్-పాకిస్థాన్ జట్లు తలపడనున్న నేపథ్యంలో ఆయన మాటలకు ప్రాధాన్యం ఏర్పడింది. "టీమ్ ఇండియాకు మా శుభాకాంక్షలు. పాకిస్థాన్‌తో క్రికెట్ ఆడే విషయంలో భారత ప్రభుత్వం తన వైఖరిని ఎప్పుడో స్పష్టం చేసింది. మేం ప్రభుత్వ ఆదేశాలను కచ్చితంగా పాటిస్తాం. పాకిస్థాన్‌తో ద్వైపాక్షిక సిరీస్‌లలో ఆడకూడదు, కేవలం ఆసియా క్రికెట్ కౌన్సిల్ (ఏసీసీ), అంతర్జాతీయ క్రికెట్ కౌన్సిల్ (ఐసీసీ) ఈవెంట్‌లలో మాత్రమే ఆడతాం" అని ధుమాల్ వివరించారు.

ప్రభుత్వం జారీ చేసిన మార్గదర్శకాల ప్రకారం, భారత జట్లు పాకిస్థాన్ పాల్గొనే అంతర్జాతీయ ఈవెంట్‌లలో ఆడవచ్చని, కానీ పాకిస్థాన్‌లో జరిగే టోర్నీలలో గానీ, ఆ దేశంతో ద్వైపాక్షిక సిరీస్‌లలో గానీ పాల్గొనకూడదని నియమం ఉంది. ఈ నిబంధన ప్రకారమే బీసీసీఐ ముందుకు వెళుతుందని ఆయన మరోసారి స్పష్టం చేశారు. ధుమాల్ వ్యాఖ్యలతో, భవిష్యత్తులో కూడా ఇరు దేశాల మధ్య సిరీస్‌లు జరిగే అవకాశం లేదని తేలిపోయింది.