ఇంటి భోజనం Vs రెడీమేడ్ ఫుడ్: బరువు తగ్గడంలో ఏది బెటర్?: తాజా అధ్యయనంలో కీలక అంశాల వెల్లడి

బరువు తగ్గాలనుకునేవారు కేవలం పోషక విలువలు చూసి ఆహారం తీసుకుంటే సరిపోదు. ఆ ఆహారాన్ని ఎంతవరకు ప్రాసెస్ చేశారన్నదే అత్యంత కీలకమని ఓ కొత్త అధ్యయనం తేల్చిచెప్పింది. ఆరోగ్యకరమైనవని చెప్పే ప్యాకేజ్డ్ ఫుడ్స్ కన్నా ఇంట్లో తాజాగా వండిన భోజనం బరువు తగ్గడానికి రెట్టింపు ప్రభావవంతంగా పనిచేస్తుందని ఈ పరిశోధన స్పష్టం చేసింది. ఈ కీలక వివరాలు ప్రముఖ సైన్స్ జర్నల్ ‘నేచర్ మెడిసిన్’లో ప్రచురితమయ్యాయి.

యూనివర్సిటీ కాలేజ్ లండన్ పరిశోధకులు ఈ అంశంపై క్లినికల్ ట్రయల్ నిర్వహించారు. ఇందులో భాగంగా 55 మంది వయోజనులను ఎంపిక చేసి, వారిని రెండు బృందాలుగా విభజించారు. ఒక బృందానికి తక్కువగా ప్రాసెస్ చేసిన (ఇంట్లో వండిన) ఆహారాన్ని ఇవ్వగా, మరో బృందానికి పోషక విలువలు సమానంగా ఉండేలా చూస్తూనే అల్ట్రా-ప్రాసెస్డ్ (రెడీ-మేడ్, ప్యాకేజ్డ్) ఆహారాన్ని అందించారు. ఈ రెండు రకాల ఆహారాల్లోనూ కొవ్వులు, ప్రొటీన్లు, కార్బొహైడ్రేట్లు, పీచుపదార్థం వంటివి అధికారిక మార్గదర్శకాలకు అనుగుణంగానే ఉన్నాయి. 

కొన్ని నెలల తర్వాత ఫలితాలను విశ్లేషించగా ఆశ్చర్యకరమైన విషయాలు వెలుగులోకి వచ్చాయి. అల్ట్రా-ప్రాసెస్డ్ ఆహారం తీసుకున్న వారితో పోలిస్తే, ఇంట్లో వండిన ఆహారం తిన్నవారు రెట్టింపు బరువు తగ్గారు. తక్కువ ప్రాసెస్ చేసిన ఆహారం తీసుకున్న వారిలో శరీర బరువు 2 శాతం తగ్గితే, ప్రాసెస్డ్ ఫుడ్ తిన్నవారిలో కేవలం 1 శాతం మాత్రమే తగ్గింది. అంతేకాకుండా ఇంట్లో వండిన భోజనం చేసిన వారిలో శరీరంలోని కొవ్వు తగ్గడం, ఆహారంపై అనారోగ్యకరమైన కోరికలు నియంత్రణలోకి రావడం, గుండె జబ్బుల ప్రమాదాన్ని సూచించే ట్రైగ్లిజరైడ్ల స్థాయులు తగ్గడం వంటి సానుకూల ఫలితాలు కనిపించాయి. అయితే, ప్రాసెస్డ్ ఫుడ్ తీసుకున్న వారిలో చెడు కొలెస్ట్రాల్ (ఎల్‌డీఎల్) తగ్గడం ఒక్కటే సానుకూల అంశంగా నమోదైంది.

ప్రస్తుతం ప్రపంచవ్యాప్తంగా ఊబకాయం పెరగడానికి రెడీ-టు-ఈట్ మీల్స్, ప్యాకేజ్డ్ స్నాక్స్ వంటి అల్ట్రా-ప్రాసెస్డ్ ఆహార పదార్థాలే ప్రధాన కారణమని నిపుణులు ఎప్పటినుంచో చెబుతున్నారు. ఆహారంలోని పోషకాలే కాకుండా, దాన్ని ఎలా తయారు చేశారన్నది కూడా ఆరోగ్యంపై తీవ్ర ప్రభావం చూపుతుందని ఈ అధ్యయనం నొక్కి చెప్పింది. అల్ట్రా-ప్రాసెస్డ్ ఫుడ్‌ను పూర్తిగా మానేయడం కష్టం కాబట్టి, సాధ్యమైనంత వరకు ఇంట్లో వండిన తాజా ఆహారాన్ని తీసుకోవడం ద్వారా మెరుగైన ఆరోగ్య ప్రయోజనాలు పొందవచ్చని పరిశోధకులు సూచిస్తున్నారు.