పాలస్తీనాపై బ్రిటన్ హెచ్చరిక.. తీవ్రంగా స్పందించిన ఇజ్రాయెల్ ప్రధాని

బ్రిటన్‌పై ఇజ్రాయెల్ ప్రధాని నెతన్యాహు తీవ్రంగా విరుచుకుపడ్డారు. కాల్పుల విరమణకు అంగీకరించని పక్షంలో పాలస్తీనాను ప్రత్యేక దేశంగా గుర్తిస్తామని బ్రిటన్ చేసిన హెచ్చరికను ఆయన ఖండించారు. హమాస్ ఉగ్ర కార్యకలాపాలకు బ్రిటన్ ప్రధాని కీర్ స్టార్మర్ బహుమతి ఇస్తున్నారని, తద్వారా హమాస్ బాధితులను శిక్షిస్తున్నట్లు అవుతోందని నెతన్యాహు ఆరోపించారు.

తమ సరిహద్దు ప్రాంతంలోని ఆ భూభాగాన్ని దేశంగా గుర్తిస్తే, అది భవిష్యత్తులో బ్రిటన్‌కు ముప్పుగా పరిణమిస్తుందని ఆయన హెచ్చరించారు. ఉగ్రవాదులను బుజ్జగించే చర్యలు ఏ మాత్రం పనిచేయవని, బ్రిటన్ విషయంలోనూ ఇదే జరుగుతుందని ఆయన స్పష్టం చేశారు.

గాజాలో కాల్పుల విరమణ దిశగా ఇజ్రాయెల్ ముందుకు రాకపోతే, సెప్టెంబరులో జరిగే ఐక్యరాజ్యసమితి సర్వసభ్య సమావేశంలో పాలస్తీనాను ప్రత్యేక దేశంగా గుర్తిస్తామని బ్రిటన్ ప్రధాని కీర్ స్టార్మర్ హెచ్చరించారు. హమాస్ కూడా తమ వద్ద బందీలుగా ఉన్నవారిని తక్షణమే విడుదల చేయాలని సూచించారు. అంతేకాకుండా కాల్పుల విరమణ ఒప్పందంపై సంతకం చేయాలని, నిరాయుధీకరణకు కట్టుబడి ఉండాలని పేర్కొన్నారు.

గాజాలో ఇజ్రాయెల్ జరుపుతున్న దాడులపై ప్రపంచవ్యాప్తంగా ఆగ్రహం వ్యక్తమవుతున్న తరుణంలో, ఫ్రాన్స్ అధ్యక్షుడు మెక్రాన్ కూడా పాలస్తీనాను దేశంగా గుర్తిస్తామని ఇటీవల ప్రకటించారు. ఈ నిర్ణయాన్ని ఇజ్రాయెల్, అమెరికా ఖండించాయి.