ఆ హెలికాప్టర్‌లోని ఏడుగురూ మృతి చెందారు: అధికారులు

ఉత్తరాఖండ్‌లో ఈ ఉదయం హెలికాప్టర్ కూలిన ఘటనలో అందులో ఉన్న ఏడుగురూ మృతి చెందినట్టు అధికారులు ధ్రువీకరించారు. కేదార్‌నాథ్ ధామ్ నుంచి గుప్తకాశీకి బయలుదేరిన హెలికాప్టర్ రుద్రప్రయాగ్ జిల్లాలోని గౌరీకుండ్ ప్రాంతంలో కూలిపోయింది. ఈ దుర్ఘటనలో హెలికాప్టర్‌లో ప్రయాణిస్తున్న పైలట్‌తో సహా ఆరుగురు యాత్రికులు అక్కడికక్కడే మృతి చెందారు. మృతులలో 23 నెలల చిన్నారి కూడా ఉండటం తీవ్ర విషాదాన్ని నింపింది.

ఉదయం సుమారు 5:20 గంటలకు ఈ ప్రమాదం సంభవించింది. కేవలం 10 నిమిషాల ప్రయాణ దూరంలో ఉండగా గౌరీకుండ్, సోన్‌ప్రయాగ్ మధ్య గౌరీమాయ్ ఖార్క్ సమీపంలోని దట్టమైన అటవీ ప్రాంతంలో హెలికాప్టర్ కుప్పకూలింది. ప్రతికూల వాతావరణం, సరిగా దారి కనపడకపోవడమే ఈ ప్రమాదానికి ప్రధాన కారణాలని అధికారులు ప్రాథమికంగా భావిస్తున్నారు.

ఉత్తరాఖండ్ పౌర విమానయాన అభివృద్ధి సంస్థ (యుకాడా) విడుదల చేసిన ప్రకటన ప్రకారం మరణించిన యాత్రికులలో ఐదుగురు పెద్దలు, ఒక చిన్నారి ఉన్నారు. వీరు ఉత్తరాఖండ్, ఉత్తరప్రదేశ్, మహారాష్ట్ర, గుజరాత్ రాష్ట్రాలకు చెందినవారని తెలిసింది. పైలట్ కూడా ఈ ప్రమాదంలో ప్రాణాలు కోల్పోయారు.

ప్రమాద విషయం తెలిసిన వెంటనే జాతీయ విపత్తు ప్రతిస్పందన దళం (ఎన్డీఆర్ఎఫ్), రాష్ట్ర విపత్తు ప్రతిస్పందన దళం (ఎస్డీఆర్ఎఫ్) బృందాలు సహాయక చర్యల కోసం ఘటనా స్థలానికి బయలుదేరాయి. ప్రమాదం జరిగిన గౌరీ మాయ్ ఖార్క్ ఎగువన ఉన్న అటవీ ప్రాంతం చాలా దట్టంగా ఉండటం, అక్కడికి చేరుకోవడానికి సరైన మార్గం లేకపోవడంతో సహాయక చర్యలకు ఆటంకం కలుగుతోంది. ఎస్డీఆర్ఎఫ్ బృందాలు కష్టతరమైన భూభాగంలో ప్రయాణిస్తూ ప్రమాద స్థలానికి చేరుకునే ప్రయత్నం చేస్తున్నాయి.

ఈ దుర్ఘటనపై ఉత్తరాఖండ్ ముఖ్యమంత్రి పుష్కర్ సింగ్ ధామి తీవ్ర దిగ్భ్రాంతి వ్యక్తం చేశారు. "రుద్రప్రయాగ్ జిల్లాలో హెలికాప్టర్ కూలిన వార్త నన్ను తీవ్రంగా కలచివేసింది. ఎస్డీఆర్ఎఫ్, స్థానిక యంత్రాంగం, ఇతర సహాయక బృందాలు సహాయక చర్యలలో నిమగ్నమై ఉన్నాయి" అని ఆయన సోషల్ మీడియాలో పేర్కొన్నారు.

మే 2న కేదార్‌నాథ్ ఆలయ ద్వారాలు తెరిచినప్పటి నుండి ఇది ఐదో విమానయాన సంబంధిత సంఘటన కావడం గమనార్హం. జూన్ 7న కూడా ఒక హెలికాప్టర్ టేకాఫ్ సమయంలో సాంకేతిక లోపంతో రుద్రప్రయాగ్-గౌరీకుండ్ రహదారిపై అత్యవసరంగా ల్యాండ్ అయింది. ఆ సమయంలో హెలికాప్టర్ తోక భాగం పార్క్ చేసి ఉన్న కారును ఢీకొనగా, సమీపంలోని భవనాలకు అత్యంత దగ్గరగా వచ్చింది. అదృష్టవశాత్తూ ఆ ఘటనలో ఐదుగురు యాత్రికులు సురక్షితంగా బయటపడగా, పైలట్‌కు స్వల్ప గాయాలయ్యాయి.