టర్కీలో పోలీసుల అదుపులో భారత యూట్యూబర్!

టర్కీ మహిళలను కించపరుస్తూ, వారిపై అసభ్యకరమైన వ్యాఖ్యలు చేసినందుకు గాను ఓ భారతీయ కంటెంట్ క్రియేటర్‌ను టర్కీ పోలీసులు అదుపులోకి తీసుకున్నట్లు తెలుస్తోంది. 'మాలిక్ స్వాష్‌బక్లర్' పేరుతో తన యూట్యూబ్ ఛానెల్‌లో వీడియోలు పోస్ట్ చేసే మాలిక్ ఎస్‌డీ ఖాన్ అనే యువకుడు తన వ్యాఖ్యలతో చిక్కుల్లో పడ్డాడు. స్థానిక మహిళలను ఉద్దేశించి అతడు చేసిన వ్యాఖ్యలు తీవ్ర దుమారం రేపడంతో ఈ పరిణామం చోటుచేసుకుంది.

మాలిక్ తన యూట్యూబ్ ఛానెల్‌లో పోస్ట్ చేసిన కొన్ని వీడియోలలో టర్కీ మహిళల పట్ల లైంగికంగా అసభ్యకరమైన భాషను ఉపయోగించాడు. హిందీలో మాట్లాడుతున్నందున స్థానికులకు తన మాటలు అర్థం కావని భావించిన మాలిక్, మహిళలను ఉద్దేశించి అత్యాచార బెదిరింపులకు కూడా పాల్పడినట్లు ఆరోపణలున్నాయి. ఈ వివాదం ముదరడంతో మాలిక్ తన యూట్యూబ్, ఇన్‌స్టాగ్రామ్ ఖాతాలను తొలగించినప్పటికీ, అతడు మాట్లాడిన వీడియోలకు సంబంధించిన కొన్ని క్లిప్‌లు సోషల్ మీడియాలో ఇప్పటికే వైరల్ అవుతున్నాయి.

ఒక వీడియో క్లిప్‌లో, మాలిక్ ఒక మహిళను ఉద్దేశించి "మాల్" (అభ్యంతరకరమైన పదం) అని వ్యాఖ్యానించడం కనిపించింది. మరో వీడియోలో, తన టర్కిష్ గైడ్‌పై రాత్రి సమయంలో లైంగిక దాడి చేయాలా అని ప్రేక్షకులను అడగడం గమనార్హం. ఇంకో వీడియోలో, మాలిక్ ఒక టర్కీ దుకాణంలోకి ప్రవేశించి, అక్కడ భారతీయ జెండా ఎందుకు ప్రదర్శించడం లేదని ప్రశ్నిస్తూ, దుకాణదారుడిపై అసభ్య పదజాలంతో దూషణలకు దిగినట్లు తెలుస్తోంది.

మాలిక్ హిందీలో మాట్లాడినప్పటికీ, ఆ భాష అర్థమైన కొందరు టర్కీ సోషల్ మీడియా వినియోగదారులు ఈ వీడియోలను గుర్తించి, వాటిపై ఫిర్యాదు చేశారు. దీంతో నెటిజన్ల నుంచి తీవ్ర వ్యతిరేకత వ్యక్తమైంది. ఈ ఫిర్యాదుల నేపథ్యంలో, 'టర్కీ టుడే' అనే స్థానిక మీడియా కథనం ప్రకారం, టర్కీ పోలీసులు మాలిక్ స్వాష్‌బక్లర్‌ను నిర్బంధించారు. అయితే, ఈ యూట్యూబర్ అరెస్ట్‌కు సంబంధించి గానీ, దర్యాప్తు వివరాలపై గానీ టర్కీ అధికారులు ఇప్పటివరకు ఎలాంటి అధికారిక ప్రకటన విడుదల చేయలేదు.

జమ్మూ కశ్మీర్‌లోని పహల్గామ్‌లో జరిగిన ఉగ్రదాడి అనంతరం పాకిస్థాన్‌కు టర్కీ మద్దతు ప్రకటించడంతో భారత్-టర్కీ సంబంధాలు ఇప్పటికే దెబ్బతిన్నాయి. ఈ ఉద్రిక్తతల నేపథ్యంలో పలువురు భారతీయ పర్యాటకులు టర్కీ పర్యటనను బహిష్కరించిన తర్వాత ఈ వీడియోలు ఆన్‌లైన్‌లో షేర్ కావడం గమనార్హం.