‘ఆపరేషన్ సిందూర్’లో నాగాస్త్ర డ్రోన్లు... సోలార్ ఇండస్ట్రీస్ షేర్లు ఆల్-టైమ్ హై!

‘ఆపరేషన్ సిందూర్’ లో స్వదేశీ నాగాస్త్ర డ్రోన్లను విజయవంతంగా ఉపయోగించినట్లు వెల్లడించిన నేపథ్యంలో ఈ డ్రోన్లను తయారుచేస్తున్న సోలార్ ఇండస్ట్రీస్ లిమిటెడ్ షేర్లు మార్కెట్ పతనంలోనూ సరికొత్త రికార్డు స్థాయికి చేరాయి. వైమానిక స్థావరాలపై జరిగిన ఈ దాడిలో నాగాస్త్ర వంటి లోయిటరింగ్ మ్యూనిషన్లు (సంచార ఆయుధాలు), వార్‌మేట్ వంటివి కీలక పాత్ర పోషించాయి. ఈ వార్తల నేపథ్యంలో బొంబాయి స్టాక్ ఎక్స్ఛేంజ్ (బీఎస్ఈ)లో గురువారం సోలార్ ఇండస్ట్రీస్ షేరు 1.5 శాతం లాభపడి రూ.13,934.90 వద్ద ముగిసింది. ఇది కంపెనీ చరిత్రలోనే గరిష్ఠ స్థాయి. ఈరోజు మొత్తం 2,672 షేర్లు చేతులు మారగా రూ.3.66 కోట్ల టర్నోవర్ నమోదైంది. గత ఏడాది కాలంలో ఈ స్టాక్ 1.1 బీటా విలువను కలిగి ఉంది. ఇది అధిక అస్థిరతను సూచిస్తుంది. సాంకేతికంగా చూస్తే సోలార్ ఇండస్ట్రీస్ ఇండియా రిలేటివ్ స్ట్రెంత్ ఇండెక్స్ (ఆర్ఎస్ఐ) 70.1 వద్ద ఉంది. ఇది స్టాక్ ఓవర్‌బాట్ జోన్‌లో ట్రేడ్ అవుతోందని సూచిస్తుంది. ప్రస్తుతం ఈ షేర్లు 5, 10, 20, 50, 100, 150, 200 రోజుల మూవింగ్ యావరేజ్‌ల కంటే పైనే ట్రేడవుతున్నాయి. గత రెండేళ్లలో 267 శాతం, ఐదేళ్లలో ఏకంగా 1,453 శాతం మల్టీబ్యాగర్ రాబడులను అందించడం ఈ స్టాక్ పనితీరుకు నిదర్శనం. కాగా, జూన్ 4, 2024న ఈ షేరు రూ. 7,889.95 వద్ద 52 వారాల కనిష్ఠ స్థాయిని తాకింది.

నాగ్‌పూర్‌కు చెందిన సోలార్ ఇండస్ట్రీస్ తన అనుబంధ సంస్థ ఎకనామిక్ ఎక్స్‌ప్లోజివ్స్ లిమిటెడ్ (ఈఈఎల్) ద్వారా ఈ నాగాస్త్ర డ్రోన్లను తయారుచేస్తోంది. బెంగళూరుకు చెందిన జెడ్‌మోషన్ సంస్థ కూడా ఈ డ్రోన్ల తయారీలో భాగస్వామి. గతేడాది జూన్‌లో 75 శాతానికి పైగా స్వదేశీ పరిజ్ఞానంతో తయారుచేసిన 480 నాగాస్త్ర-1 లోయిటరింగ్ మ్యూనిషన్ల మొదటి బ్యాచ్‌ను భారత సైన్యానికి సోలార్ ఇండస్ట్రీస్ అందజేసింది.

నాగాస్త్ర ప్రత్యేకతలు
నాగాస్త్ర డ్రోన్ అనేది ఒక రకమైన ‘లోయిటరింగ్ మ్యూనిషన్’. అంటే, ఇది నిర్దేశిత ప్రాంతంపై గాల్లోనే చక్కర్లు కొడుతూ, లక్ష్యాలను గుర్తించి వాటిని ఛేదించగలదు. ప్రయాణ మార్గంలో కూడా లక్ష్యాన్ని మార్చుకుని దాడి చేయగల సామర్థ్యం దీని సొంతం. ఈ డ్రోన్‌లో సున్నితమైన లక్ష్యాలను సమర్థవంతంగా నిర్వీర్యం చేయడానికి కేజీ బరువున్న శక్తివంతమైన హై-ఎక్స్‌ప్లోజివ్ ఫ్రాగ్మెంటేషన్ వార్‌హెడ్ అమర్చారు. పగలు, రాత్రి సమయాల్లో నిఘా కెమెరాలు, కమ్యూనికేషన్ మాడ్యూల్స్‌తో కూడిన గ్రౌండ్ కంట్రోల్ స్టేషన్, న్యూమాటిక్ లాంచర్ వంటి అత్యాధునిక సదుపాయాలు ఇందులో ఉన్నాయి. నాగాస్త్ర-1 సులభంగా మోసుకెళ్లగలిగే వ్యవస్థ. దీని మొత్తం బరువు సుమారు 30 కిలోలు. ఒకవేళ మిషన్ రద్దు అయినా లేదా లక్ష్యం కనుగొనబడకపోయినా నాగాస్త్ర-1 డ్రోన్ పారాచూట్ సహాయంతో సురక్షితంగా బేస్‌కు తిరిగి వచ్చేలా రూపొందించారు. దీనివల్ల వీటిని తిరిగి ఉపయోగించుకోవచ్చు. సోలార్ ఇండస్ట్రీస్ ప్రధానంగా మైనింగ్, మౌలిక సదుపాయాల రంగాలకు అవసరమైన పారిశ్రామిక పేలుడు పదార్థాలను తయారుచేసే భారతీయ సంస్థ. పారిశ్రామిక పేలుడు పదార్థాలతో పాటు రక్షణ ఉత్పత్తులను కూడా కంపెనీ అందిస్తోంది.