నకిలీ సంస్థల పేరిట బ్యాంకుకు కోట్లు టోపీ... 15 మంది సైబర్ నేరగాళ్ల అరెస్ట్!

హైదరాబాద్ లో సైబర్ నేరగాళ్లు రెచ్చిపోయారు. అమాయకుల పేరిట రుణాలు తీసుకున్నవారిని, క్రెడిట్ కార్డు కస్టమర్ కేర్ పేరుతో మోసాలకు పాల్పడిన పదిహేనుమందిని సైబర్ క్రైమ్ పోలీసులు అరెస్ట్ చేశారు. హెచ్‌డీఎఫ్‌సీ బ్యాంకు నుండి కొంతమంది పేరిట రూ.4.38 కోట్ల రుణాలు తీసుకున్న పది మందిని అరెస్ట్ చేశారు. వీరు నకిలీ కంపెనీల పేరుతో ఉద్యోగాలు ఇచ్చి, వారి డాక్యుమెంట్లతో పర్సనల్ లోన్స్ తీసుకున్నారు. రుణాలు మంజూరు అయ్యాక వారిని ఉద్యోగం నుండి తొలగించినట్లు పోలీసుల విచారణలో వెల్లడైంది. బ్యాంకు అధికారులు ఫిర్యాదు చేయడంతో పోలీసులు దర్యాఫ్తు చేపట్టారు. ఈ ఘటనకు సంబంధించి 10 మందిని అరెస్ట్ చేశారు.

మరో ఘటనలో క్రెడిట్ కార్డు కస్టమర్ కేర్ పేరుతో మోసాలకు పాల్పడిన ఐదుగురిని సైబర్ క్రైమ్ పోలీసులు అరెస్ట్ చేశారు. ఎస్బీఐ క్రెడిట్ కార్డు కస్టమర్ కేర్ నెంబర్ కోసం ఓ వ్యక్తి గూగుల్ లో వెతికాడు. ఈ క్రమంలో నకిలీ నెంబర్ ను గుర్తించలేక ఆ నెంబర్ కు ఫోన్ చేశాడు. కస్టమర్ కేర్ సిబ్బందిగా బాధుతుడ్ని నమ్మించిన సైబర్ నేరగాళ్లు అతని మొబైల్ లో ఎనీ డెస్క్ యాప్ ను డౌన్ లోడ్ చేసుకోమని సూచించారు. అనంతరం బాధితుడి క్రెడిట్ కార్డు నుండి రూ.16 వేలు తీసుకున్నారు. తాను మోసపోయినట్లు గుర్తించిన బాధితుడు సైబర్ క్రైమ్ పోలీసులకు ఫిర్యాదు చేశాడు. ఈ ఘటనకు సంబంధించి పోలీసులు విచారణ జరిపి ఢిల్లీలో నిందితుల్ని అరెస్ట్ చేశారు.