కడప జిల్లా గురుకుల పాఠశాలలో 9వ తరగతి బాలిక ప్రసవం

కడప జిల్లా వాల్మీకిపురంలో ఉన్న గురుకుల పాఠశాలలో దారుణ ఘటన చోటుచేసుకుంది. పాఠశాలలో తొమ్మిదో తరగతి చదువుతున్న ఒక బాలిక ప్రసవించింది. ఈ ఘటన స్థానికంగా కలకలం రేపింది. బాధితురాలికి నిన్న సాయంత్రం కడుపునొప్పి వచ్చింది. నొప్పిని భరించలేకపోతున్న ఆమెను చూసి పాఠశాల సిబ్బంది ఆసుపత్రికి తరలించారు. వైద్యులు చికిత్స చేస్తున్న సమయంలో ఆమె గర్భవతి అని నిర్ధారించారు. ఆ తర్వాత నిమిషాల వ్యవధిలోనే సదరు బాలిక మగబిడ్డకు జన్మనిచ్చింది. 

ఈ విషయం తెలుసుకున్న స్థానిక తహసీల్దార్ ఫిరోజ్ ఖాన్, ఎస్సై బిందుమాధవి హుటాహుటిన ఆసుపత్రికి తరలివచ్చారు. ఆమెను మెరుగైన వైద్యం కోసం తిరుపతికి తరలించారు. ఈ ఘటనపై జిల్లా కలెక్టర్ తీవ్ర ఆగ్రహాన్ని వ్యక్తం చేశారు. విచారణకు ఆదేశించారు. మరోవైపు బాధితురాలు గర్భం దాల్చడానికి ఆమె మేనమామే కారణం అనే అనుమానాలు కూడా వ్యక్తమవుతున్నాయి.