Samantha: టాక్ షోకి హోస్టుగా వ్యవహరించనున్న సమంత!

పెళ్లయ్యాక కూడా ఏమాత్రం గ్లామర్ తగ్గకుండా సినిమాలలో కొనసాగుతున్న కథానాయిక సమంత. కొత్త తారలు వస్తున్నా కూడా ఆమె డిమాండ్ మాత్రం ఇంకా తగ్గలేదు. ఇప్పటికే తెలుగు, తమిళ భాషల్లో కొన్ని సినిమాలలో నటిస్తున్న ఈ ముద్దుగుమ్మ అటు టీవీపైనా, ఇటు ఓటీటీ ప్లేట్ ఫామ్ పైన కూడా దృష్టి పెట్టింది.

ఈ క్రమంలో ఇటీవల తన మామ అక్కినేని నాగార్జున స్థానంలో 'బిగ్ బాస్ 4' రియాలిటీ షోకి కొన్ని ఎపిసోడ్లకు గాను హోస్టుగా కూడా వ్యవహరించింది. మంచి సమయస్ఫూర్తితో రియాలిటీ షోని రక్తికట్టించిందంటూ ప్రశంసలు కూడా పొందింది. ఇదిలావుంచితే, ఈ చిన్నది త్వరలో ఓటీటీ ప్లాట్ ఫామ్ పై ఓ టాక్ షో చేయనున్నట్టుగా తెలుస్తోంది.

'ఆహా' ఓటీటీ కోసం సమంత ఈ టాక్ షోను చేస్తోందట. ప్రస్తుతం ఈ షోకి సంబంధించిన షూటింగ్ కూడా జరుగుతున్నట్టు సమాచారం. ఇందులో మన సినిమా ఇండస్ట్రీ ప్రముఖులు గెస్టుగా పాల్గొంటారని, ఆద్యంతం ఈ షో చాలా సరదాగా.. ఆహ్లాదకరంగా సాగుతుందని అంటున్నారు.