అతనిలో అప్పటికీ, ఇప్పటికీ ఏం మార్పులేదు... అదే ప్రవర్తన!: గల్లా జయదేవ్

లోక్ సభలో ఇవాళ కూడా టీడీపీ, వైసీపీ ఎంపీల మధ్య ఆగ్రహావేశాలు చోటుచేసుకున్నాయి. కియా మోటార్స్ ఏపీ నుంచి వెళ్లిపోతోందన్న మీడియా కథనాల నేపథ్యంలో ఈ అంశాన్ని టీడీపీ సభ్యుడు రామ్మోహన్ నాయుడు లేవనెత్తగా, వైసీపీ ఎంపీ గోరంట్ల మాధవ్ తీవ్ర అభ్యంతరం వ్యక్తం చేశారు. ఈ ఘటనపై టీడీపీ ఎంపీ గల్లా జయదేవ్ స్పందించారు.

నాడు, ఓ ప్రపంచస్థాయి సంస్థ తొలి వాహనం ఆవిష్కరిస్తున్న సందర్భం కానివ్వండి, నేడు పార్లమెంటులో జరిగిన ఘటన తీసుకోండి... అప్పటికీ ఇప్పటికీ అతనిలో ఏ మార్పులేదు, అదే ప్రవర్తన! అంటూ ట్వీట్ చేశారు. అంతేకాదు, అప్పట్లో గోరంట్ల మాధవ్ కియా సంస్థ ప్రతినిధికి వేలు చూపిస్తున్న ఫొటోతోపాటు, ఇవాళ లోక్ సభలో తన సీట్లోంచి లేచి ఆవేశం ప్రదర్శిస్తున్న ఫొటోను తన ట్వీట్ లో పొందుపరిచారు.