ఈ వర్షాలకు తుపాను కారణం కాదు: వాతావరణ శాఖ

తుపాను ప్రభావంతోనే ప్రస్తుతం వానలు కురుస్తున్నాయన్న వార్తల్లో నిజం లేదని హైదరాబాద్ వాతావరణ కేంద్రం తెలిపింది. దక్షిణ మహారాష్ట్ర, దానిని ఆనుకుని ఉన్న గోవా, కర్ణాటక, తూర్పు మధ్య అరేబియా సముద్ర ప్రాంతాలలో ఉపరితల ఆవర్తనం కొనసాగుతోందని, ఈ కారణంగా మహారాష్ట్ర, మధ్యప్రదేశ్, ఆగ్నేయ ఉత్తరప్రదేశ్ మీదుగా బీహార్ వరకు ఉపరితల ఆవర్తన ద్రోణి కొనసాగుతోందని అధికారులు తెలిపారు. దీని ప్రభావంతో వచ్చే మూడు రోజుల్లో తెలంగాణలో తేలికపాటి నుంచి ఓ మోస్తరు వర్షాలు కురిసే అవకాశం ఉందని తెలిపారు. ప్రస్తుతం కురుస్తున్న వర్షాలకు, తుపానుకు ఎటువంటి సంబంధం లేదని స్పష్టం చేశారు.