దేశంలోనే ఓ పెద్ద బఫూన్ రాహుల్ గాంధీ: కేసీఆర్ తీవ్ర వ్యాఖ్యలు

కాంగ్రెస్ పార్టీ జాతీయ అధ్యక్షుడు రాహుల్ గాంధీపై ఆపద్ధర్మ ముఖ్యమంత్రి కేసీఆర్ తీవ్ర వ్యాఖ్యలు చేశారు. తెలంగాణ భవన్ లో ఏర్పాటు చేసిన విలేకరుల సమావేశంలో ఆయన మాట్లాడుతూ ఈ వ్యాఖ్యలు చేశారు. రాహుల్ ఏంటో అందరికీ తెలుసని, దేశంలోనే ఓ పెద్ద బఫూన్ రాహుల్ అని, లోక్ సభలో నరేంద్ర మోదీ దగ్గరకు వెళ్లి ఆయన్ని హత్తుకోవడం, ఆ తర్వాత కన్ను కొట్టడం దేశమంతా చూసిందని విమర్శించారు. హైదరాబాద్ లో రాహుల్ ఇటీవల పర్యటించడంపైనా ఆయన విమర్శలు గుప్పించారు. తెలంగాణలో రాహుల్ ఎన్నిసార్లు పర్యటిస్తే తమకు అంత మంచిదని, మరిన్ని ఎక్కువ స్థానాలను తాము గెలుచుకుంటామని అన్నారు.