కనీసం హైద‌రాబాద్‌ మేయర్‌ను కూడా పట్టించుకోలేదు: వీహెచ్‌

హైదరాబాద్‌లోని హెచ్ఐసీసీలో జ‌రిగిన ప్రపంచ ఔత్సాహిక పారిశ్రామిక వేత్తల సదస్సును తెలంగాణ ప్ర‌భుత్వం నిర్వ‌హించిన తీరుపై కాంగ్రెస్‌ సీనియర్‌ నేత వీ హనుమంతరావు త‌ప్పుప‌ట్టారు. అది తెలంగాణ మంత్రి కేటీఆర్‌ షోగా నడిచిందని ఎద్దేవా చేశారు. ఈ సదస్సులో ఇత‌ర‌ నేతలను భాగస్వామ్యం చేయకుండా అవమానించార‌ని ఆయ‌న అన్నారు. తెలంగాణ ప్ర‌భుత్వం హైద‌రాబాద్ మేయ‌ర్ రామ్మోహ‌న్ రావును కూడా పట్టించుకోలేదని, ఆ పదవికి ఇచ్చే గౌరవం ఇదేనా? అని నిల‌దీశారు. జీఈ సదస్సుకు వ‌చ్చిన అమెరికా అద్యక్షుడి కూతురు, సలహాదారు ఇవాంక ట్రంప్‌కు ప్ర‌భుత్వం అవాస్తవాలు చెప్పుకుంద‌ని, వాస్తవాలు తెలుసుకోవాలని ఆమెకు తాము లేఖ రాశామని ఆయ‌న అన్నారు.