ఇరాక్‌ రాజధాని బాగ్దాద్ ఉగ్ర‌దాడుల‌తో ద‌ద్ద‌రిల్లిపోతోంది. ఉగ్ర‌వాదులు వ‌రుస‌గా చేస్తోన్న దాడులతో అక్క‌డి ప్ర‌జ‌లు బిక్కుబిక్కుమంటూ బ‌తుకుతున్నారు. రెండు రోజుల క్రితం సెంట్రల్‌ బాగ్దాద్‌లో చోటు చేసుకున్న బాంబు పేలుళ్లలో 27 మంది మృత్యువాతపడిన ఘ‌ట‌న నుంచి తేరుకోక‌ముందే ఈ రోజు మ‌రోసారి ఉగ్ర‌దాడి జ‌రిగింది. బాగ్దాద్‌కు ఈశాన్యంలోని సదర్‌ నగరంలో గుమికూడి ఉండే వారిని లక్ష్యంగా చేసుకొని ఓ ఉగ్రవాది కారు నిండా బాంబులతో వెళ్లి ఆత్మాహుతి దాడికి దిగాడు. ఈ దాడిలో 17 మంది ప్రాణాలు కోల్పోగా 39 మందికి తీవ్ర‌గాయాల‌య్యాయి. ఈ ఘ‌ట‌న‌లో బాధితులంతా రోజువారి కూలీలు, శ్రామికులని అక్క‌డి అధికారులు తెలిపారు. ఈ దాడి చేసింది తామేన‌ని ఇప్పటి వరకు ఏ ఉగ్రవాద సంస్థ ప్రకటించుకోలేదు. కాగా, ఇక్క‌డ ఇస్లామిక్‌ స్టేట్ త‌రుచుగా దాడులు జ‌రుపుతోంది.