భార్య, మామలను నరికేసిన కసాయి!... అత్త, బావమరిదిపైనా కత్తితో దాడి చేసిన వైనం!
కృష్ణా జిల్లా చాట్రాయి మండలం కోటపాడు గ్రామంలో నిన్న రాత్రి పొద్దుపోయిన తర్వాత దారుణం చోటుచేసుకుంది. కట్టుకున్న భార్యపై అనుమానం పెంచుకున్న ఓ భర్త కత్తిచేతబట్టి భార్య సహా మామ, అత్త, బావమరిదిపై దాడికి దిగాడు. ఈ ఘటనలో భార్య, మామ అక్కడికక్కడే ప్రాణాలు కోల్పోగా, బావమరిదికి తీవ్రగాయాలయ్యాయి. వివరాల్లోకెళితే... పుట్టింటికి చేరిన భార్యపై కోపంతో ఊగిపోయిన సుబ్రహ్మణం నిన్న రాత్రి కత్తి చేతబట్టుకుని దాడికి దిగాడు. భార్య విజయతో పాటు మామ వెంకటేశ్వరరావులను నరికేశాడు. రెప్పపాటులో జరిగిన ఈ దాడిలో వారిద్దరూ అక్కడికక్కడే చనిపోయారు.
ఈ దాడిని అడ్డుకోబోయిన తన బావమరిది శివరామకృష్ణ, అత్తపైనా సుబ్రహ్మణ్యం దాడి చేశాడు. శివరామకృష్ణకు తీవ్ర గాయాలు కాగా అతడి తల్లి స్వల్ప గాయాలతో బయటపడింది. దాడి అనంతరం సుబ్రహ్మణ్యం అక్కడి నుంచి పరారయ్యాడు. ఈ క్రమంలో అతడిని ఆపేందుకు యత్నించిన బంధువు వెంకటేశ్వరరావుపైనా అతడు దాడికి దిగాడు. ఈ దాడిలో వెంకటేశ్వరరావుకు కూడా తీవ్ర గాయాలయ్యాయి. అయితే కాస్తంత అప్రమత్తంగా వ్యవహరించిన పొరుగు గ్రామం పర్వతపురం గ్రామస్తులు ఎట్టకేలకు అతడిని నిలువరించి పోలీసులకు పట్టించారు.
