నెల్లూరు జిల్లాలో ఓ డీఎస్పీ, సీఐ పరస్పరం ఘర్షణకు దిగారు. చిల్లకూరు మండలం తూర్పుకనుపూరులో శ్రీముత్యాలమ్మ జాతర సందర్భంగా ఈ ఘటన చోటుచేసుకుంది. జాతరకు పెద్ద ఎత్తున భక్తులు తరలి వచ్చే నేపథ్యంలో, అక్కడ భారీ బందోబస్తు ఏర్పాటు చేశారు. గూడూరు డీఎస్పీ మస్తానయ్య, టూటౌన్ సీఐ నారాయణరెడ్డి బందోబస్తు పర్యవేక్షిస్తున్నారు. ఇంతలో ఏమైందో ఏమోగానీ, వారిద్దరూ పరస్పరం కలబడ్డారు. చొక్కాలు పట్టుకుని బాహాబాహీకి దిగారు. ఘర్షణ పెరుగుతుండడంతో పక్కనే ఉన్న ఇతర పోలీసులు వారిద్దరినీ శాంతింపజేశారు. అనంతరం, సీఐ ఉన్నతాధికారులకు డీఎస్పీపై ఫిర్యాదు చేశాడట. కాగా, ఘటనను వీక్షించిన ప్రజలు పోలీసుల తీరు పట్ల ఆశ్చర్యపోయారు. శాంతిభద్రతలు కాపాడాల్సినవారే ఇలా బహిరంగంగా ఘర్షణకు దిగడమేంటని అనుకుంటున్నారు.