భారత టెన్నిస్ స్టార్ సానియా మీర్జా మరో రికార్డుకు అడుగు దూరంలో నిలిచింది. మెల్బోర్న్ లో జరుగుతున్న ఆస్ట్రేలియా ఓపెన్ మిక్స్ డ్ డబుల్స్ లో సానియా మీర్జా, ఒరియా టేకు జోడి ఫైనల్స్ లోకి ప్రవేశించింది. ఈ రోజు జరిగిన సెమీ ఫైనల్స్ లో సానియా జోడి ఆస్ట్రేలియాకు చెందిన గజ్డెసోవా, ఎబ్డెన్ జంటను 2-6, 6-3, 10-8తో మట్టి కరిపించి ఫైనల్స్ లోకి దూసుకెళ్లింది. మొదటి సెట్ ను 2-6తో కోల్పోయినప్పటికీ... ఆత్మవిశ్వాసాన్ని కోల్పోకుండా ఆడిన సానియా, టేకు రెండో సెట్ ను 6-3తో గెలుచుకున్నారు. మూడో సెట్లో ఇరు జట్లు హోరాహోరీగా పోరాడాయి. అయితే ఏ మాత్రం పట్టు సడలించకుండా ఆడి 10-8తో చివరి సెట్ ను కైవసం చేసుకున్న సానియా జోడి ఫైనల్స్ చేరుకుంది.