మాదకద్రవ్యాల వ్యాపారంలో పంజాబ్ రెవెన్యూ మంత్రి బిక్రమ్ సింగ్ మజీతియా హస్తం ఉందని సాక్షాత్తూ కోర్టులోనే నిందితుడు చెప్పడం సంచలనం కలిగిస్తోంది. అక్కడితో అతను ఆగలేదు. కోట్లాది వ్యాపారం మొత్తం అతని కనుసన్నల్లోనే జరుగుతోందని, ఆ విషయం పోలీసులకు కూడా తెలుసని చెప్పాడు. గత నవంబర్ లో జగదీష్ భోలా అనే వ్యక్తి మాదకద్రవ్యాలు రవాణా చేస్తూ ఢిల్లీలో పోలీసులకు పట్టుబడ్డాడు. అతనిని న్యాయస్థానంలో హాజరుపర్చగా నేరుగా జడ్జి వద్దే ఈ వ్యాఖ్యలు చేశాడు. కావాలంటే సీబీఐ చేత దర్యాప్తు చేయించాలని భోలా సూచించాడు. దీనిపై బిక్రమ్ సింగ్ మాట్లాడుతూ, జగదీష్ పేరొందిన నేరగాడని, అతడు చేసిన నేరాలకు జీవితఖైదు శిక్షపడే అవకాశం ఉందని, అలాంటి వ్యక్తి మాటలు నమ్మాల్సిన అవసరం లేదని అన్నారు.