సమంతపై రామ్ చరణ్ ప్రశంసలు.. అసాధారణ ధైర్యశాలి అంటూ ట్వీట్

గ్లోబల్ స్టార్ రామ్ చరణ్ ప్రముఖ నటి సమంతపై ప్రశంసల వర్షం కురిపించారు. నేడు విడుదలైన సమంత తాజా చిత్రం 'మా ఇంటి బంగారం' నేపథ్యంలో ఆమెను 'అసాధారణ ధైర్యవంతురాలు' అంటూ కొనియాడారు. ఈ సినిమాకు ప్రేక్షకుల నుంచి సానుకూల స్పందన లభిస్తున్న తరుణంలో చరణ్ చేసిన అభినందనలు ప్రాధాన్యత సంతరించుకున్నాయి.

ఈ సందర్భంగా రామ్ చరణ్ 'ఎక్స్' వేదికగా స్పందిస్తూ, "ప్రియమైన సమంత, మీరు ఎల్లప్పుడూ అసాధారణమైన శక్తి, సౌందర్యం మరియు ఆత్మవిశ్వాసం కలిగిన మహిళ" అని పేర్కొన్నారు. "'మా ఇంటి బంగారం' సినిమా గురించి అద్భుతమైన విషయాలు వింటున్నాను. ఈ విజయాన్ని అందుకున్న మీకు, చిత్ర బృందానికి నా హృదయపూర్వక అభినందనలు. మీ అందరి విజయం పట్ల నేను ఎంతో సంతోషిస్తున్నాను" అని తన పోస్ట్‌లో రాసుకొచ్చారు.

రామ్ చరణ్ ప్రశంసలపై సమంత స్పందిస్తూ, ఈ మాటలు తనకు, తన చిత్ర బృందానికి ఎంతో విలువైనవని బదులిచ్చారు.

నందిని రెడ్డి దర్శకత్వం వహించిన ఈ చిత్రాన్ని సమంత స్వయంగా నిర్మించడం విశేషం. ఇందులో వాస్తవిక యాక్షన్ సన్నివేశాల్లో ఆమె డూప్ లేకుండా నటించి మెప్పించారు. మయోసైటిస్ అనే ఆటో ఇమ్యూన్ వ్యాధితో పోరాడి, కొంతకాలం సినిమాలకు విరామం తీసుకున్న తర్వాత సమంత వరుసగా సినిమాలు చేస్తున్నారు. ఈ నేపథ్యంలో, 'మా ఇంటి బంగారం'పై ప్రేక్షకుల్లో ప్రత్యేక ఆసక్తి నెలకొంది.