అమ్మ ఫోన్ చేస్తే ప్రెస్ కాన్ఫరెన్స్ అయినా ఆగాల్సిందే.. మనసులు గెలుచుకున్న నితీశ్కుమార్ రెడ్డి!
- ఆఫ్ఘనిస్థాన్తో మ్యాచ్ తర్వాత ప్రెస్ మీట్లో పాల్గొన్న నితీశ్కుమార్ రెడ్డి
- మీడియా సమావేశం మధ్యలో తల్లి నుంచి ఫోన్ కాల్
- 'అమ్మా, 5 నిమిషాల్లో చేస్తా' అంటూ తెలుగులో వినయంగా సమాధానం
- ఈ ఘటన వీడియోను షేర్ చేసిన బీసీసీఐ.. సోషల్ మీడియాలో వైరల్
- నితీశ్ సంస్కారం, వినయంపై నెటిజన్ల నుంచి ప్రశంసల వర్షం
ఆఫ్ఘనిస్థాన్పై భారత్ విజయం సాధించిన తర్వాత నితీశ్కుమార్ మీడియా సమావేశంలో పాల్గొన్నాడు. పాత్రికేయులు ప్రశ్నలు అడుగుతుండగా ఆయన ఫోన్ మోగింది. ఫోన్ స్క్రీన్పై 'అమ్మ' అని చూసిన వెంటనే, నితీశ్ విలేకరులకు క్షమాపణలు చెప్పి కాల్ లిఫ్ట్ చేశాడు. "అమ్మా, నేను మళ్లీ చేస్తాను, ఫైవ్ మినిట్స్" అని తన మాతృభాష తెలుగులో ఎంతో మర్యాదగా చెప్పి ఫోన్ పెట్టేశాడు. అనంతరం చిరునవ్వుతో ప్రెస్ మీట్ను కొనసాగించాడు.
ఈ అందమైన క్షణాలను భారత క్రికెట్ కంట్రోల్ బోర్డ్ (BCCI) తన అధికారిక సోషల్ మీడియా ఖాతాలో పంచుకుంది. దీంతో ఈ వీడియో క్షణాల్లో వైరల్గా మారింది. అంతర్జాతీయ స్థాయిలో ఆడుతున్నప్పటికీ, తన తల్లికి నితీశ్ ఇస్తున్న గౌరవాన్ని చూసి నెటిజన్లు, క్రీడాభిమానులు ప్రశంసలు కురిపిస్తున్నారు. మైదానంలో అద్భుత ప్రదర్శనతో పాటు, మైదానం బయట తన సంస్కారంతోనూ నితీశ్ ఆకట్టుకుంటున్నాడని కామెంట్లు చేస్తున్నారు.
కాగా, ఈ మ్యాచ్లో నితీశ్కుమార్ కీలకమైన మహ్మద్ నబీ వికెట్ను పడగొట్టి భారత విజయంలో తన వంతు పాత్ర పోషించాడు. హార్దిక్ పాండ్యా స్థానంలో జట్టులోకి వచ్చిన నితీశ్, తన ఆల్రౌండ్ నైపుణ్యాలతో భవిష్యత్ స్టార్గా ఎదుగుతున్నాడు.
