అన్నం, రొట్టె కలిపి తినొద్దు.. ఆరోగ్యానికి ముప్పేనంటున్న నిపుణులు!

భారతీయులు చాలా మంది ఒకే భోజనంలో అన్నం, రొట్టె రెండూ తినడానికి ఇష్టపడతారు. అయితే, ఈ అలవాటే దేశంలో పెరుగుతున్న డయాబెటిస్, ఊబకాయం, గుండె జబ్బులకు ఒక ప్రధాన కారణంగా మారుతోందని ఆరోగ్య నిపుణులు హెచ్చరిస్తున్నారు. అన్నం లేదా రొట్టె ఆరోగ్యానికి హానికరం కాకపోయినా, రెండింటినీ ఒకేసారి అధిక మొత్తంలో తీసుకోవడమే అసలు సమస్యకు మూలమని వారు స్పష్టం చేస్తున్నారు.

గతంలో ఉత్తరాదిలో రొట్టె, దక్షిణాదిలో అన్నం ప్రధాన ఆహారంగా ఉండేది. పట్టణీకరణ పెరిగాక, ఈ రెండు ఆహారాలు ఒకే ప్లేటులోకి చేరాయి. దీనివల్ల భోజనంలో కార్బోహైడ్రేట్ల వాటా విపరీతంగా పెరిగి, ప్రోటీన్లు, కూరగాయలు, పీచుపదార్థాల వాటా తగ్గిపోతోంది. ఇలా అధిక కార్బోహైడ్రేట్లు తీసుకోవడం వల్ల రక్తంలో చక్కెర స్థాయిలు వేగంగా పెరిగి, ఇన్సులిన్ నిరోధకతకు దారితీస్తుంది. ఇది క్రమంగా మధుమేహం, ఊబకాయం వంటి సమస్యలకు కారణమవుతుంది.

ఆరోగ్యకరమైన భోజనం ఎలా?

ఆరోగ్యంగా ఉండాలంటే భోజనాన్ని సమతులంగా మార్చుకోవాలని నిపుణులు సూచిస్తున్నారు. వారి సలహా ప్రకారం... మీ భోజనం ప్లేటులో సగం భాగం కూరగాయలు, సలాడ్లతో నింపాలి. మరో పావు వంతులో పప్పు, పనీర్, గుడ్లు, చికెన్ వంటి ప్రోటీన్లు ఉండేలా చూసుకోవాలి. మిగిలిన పావు వంతులో మాత్రమే అన్నం లేదా రొట్టె వంటి కార్బోహైడ్రేట్లను తీసుకోవాలి.

ఆహారాన్ని పూర్తిగా మానేయడం కంటే, పరిమాణంపై దృష్టి పెట్టడం, ప్లేటును సమతులంగా మార్చుకోవడం ద్వారా ఆరోగ్య సమస్యలను దూరంగా ఉంచుకోవచ్చని నిపుణులు స్పష్టం చేస్తున్నారు.