మూడు రోజుల్లోనే భారీ వసూళ్లు.. అన్‌స్టాపబుల్‌గా దూసుకుపోతున్న 'పెద్ది'

మెగా పవర్‌స్టార్ రామ్ చరణ్, దర్శకుడు బుచ్చిబాబు సానా కాంబినేషన్‌లో వచ్చిన పీరియాడిక్ స్పోర్ట్స్ డ్రామా 'పెద్ది' బాక్సాఫీస్ వద్ద కలెక్షన్ల సునామీ సృష్టిస్తోంది. ఈ చిత్రం విడుదలైన కేవలం మూడు రోజుల్లోనే ప్రపంచవ్యాప్తంగా రూ. 236.7 కోట్ల గ్రాస్ వసూలు చేసి అన్‌స్టాపబుల్‌గా దూసుకుపోతోంది.

ఈ సినిమా తొలిరోజు ప్రపంచవ్యాప్తంగా రూ. 135.36 కోట్ల భారీ గ్రాస్‌తో అద్భుతమైన ఆరంభాన్ని అందుకుంది. రెండో రోజు ముగిసేసరికి ఈ వసూళ్లు రూ. 181.8 కోట్లకు చేరాయి. తాజాగా మూడో రోజు కూడా అదే జోరు కొనసాగించి, మొత్తం రూ. 236.7 కోట్ల గ్రాస్‌ను సాధించినట్లు చిత్ర నిర్మాణ సంస్థ అధికారికంగా ప్రకటించింది. ఈ సందర్భంగా 'బాక్సాఫీస్ ఛాంపియన్ పెద్ది అన్‌స్టాపబుల్' అనే క్యాప్షన్‌తో ఓ ప్రత్యేక పోస్టర్‌ను సోషల్ మీడియాలో విడుదల చేసింది.

థియేటర్ కలెక్షన్లతో పాటు ఆన్‌లైన్ టికెట్ అమ్మకాల్లోనూ ఈ సినిమా సరికొత్త రికార్డులు నెలకొల్పుతోంది. ప్రముఖ ఆన్‌లైన్ టికెటింగ్ ప్లాట్‌ఫామ్‌లు అయిన బుక్‌మైషో, డిస్ట్రిక్ట్ యాప్‌లలో కలిపి ఇప్పటివరకు ఏకంగా 4 మిలియన్లకు పైగా టికెట్లు అమ్ముడైనట్లు చిత్ర యూనిట్ వెల్లడించింది. వారాంతంలో రికార్డు స్థాయి వసూళ్లు సాధించిన ఈ చిత్రం, రానున్న రోజుల్లో మరిన్ని మైలురాళ్లను అందుకుంటుందని ట్రేడ్ వర్గాలు అంచనా వేస్తున్నాయి.