జంట ప్రేమ వివాహం.. దాడి చేసి యువతిని ఎత్తుకెళ్లిన తల్లిదండ్రులు

ఏలూరు జిల్లా ద్వారకాతిరుమల మండలం ఐఎస్ రాఘవాపురంలో దారుణం చోటుచేసుకుంది. ప్రేమ వివాహం చేసుకుందన్న కారణంతో ఓ జంటపై యువతి తల్లిదండ్రులు, బంధువులు దాడికి పాల్పడ్డారు. నవ దంపతులపై ఇనుప రాడ్లతో దాడి చేసి, యువతిని బలవంతంగా ఎత్తుకెళ్లడం స్థానికంగా తీవ్ర ఉద్రిక్తతకు దారితీసింది.

వివరాల్లోకి వెళ్తే.. ఐఎస్ రాఘవాపురానికి చెందిన సంజిత్, కామవరపుకోట మండలం వెంకటాపురానికి చెందిన పద్మ కొంతకాలంగా ప్రేమించుకుంటున్నారు. వీరి వివాహానికి పద్మ తల్లిదండ్రులు అంగీకరించలేదు. దీంతో ఈ జంట గత నెల 20న ఏలూరులోని అంబేద్కర్ నవ సమాజ్ సొసైటీలో పెళ్లి చేసుకున్నారు. వివాహం అనంతరం తమకు ప్రాణహాని ఉందని, రక్షణ కల్పించాలని పోలీసులకు ఫిర్యాదు కూడా చేశారు.

ఈ నేపథ్యంలో నిన్న రాత్రి పద్మ తల్లిదండ్రులు, బంధువులు సంజిత్ ఇంటికి వచ్చారు. సంజిత్, పద్మలపై ఇనుప రాడ్లతో విచక్షణారహితంగా దాడి చేశారు. అనంతరం పద్మను బలవంతంగా తమ వెంట తీసుకెళ్లారు.

ఈ దాడిలో గాయపడిన సంజిత్ ఈరోజు పోలీసులకు ఫిర్యాదు చేశారు. బాధితుడి ఫిర్యాదు మేరకు ద్వారకాతిరుమల పోలీసులు కేసు నమోదు చేసి దర్యాప్తు చేపట్టారు. పద్మ ఆచూకీ కోసం గాలిస్తున్నట్లు తెలిపారు. తల్లిదండ్రులే దాడి చేసి, కుమార్తెను అపహరించుకుపోయిన ఈ ఘటన స్థానికంగా కలకలం రేపింది.