లోక్‌సభలో 'యార్' అని సంభోదించిన సభ్యుడు.. ప్యానెల్ స్పీకర్ మందలింపు

లోక్‌సభలో ప్రతిపక్ష సభ్యుడు ఒకరు ప్యానల్ స్పీకర్‌ను ఉద్దేశించి 'యార్' అని సంభోదించడం సభలో కాస్త గందరగోళానికి కారణమైంది. భారత ఆర్మీ మాజీ చీఫ్ నరవణే రాసిన ఆత్మకథలోని అంశాలను ప్రతిపక్ష నేత రాహుల్ గాంధీ ఈరోజు కూడా ప్రస్తావించారు. దీంతో లోక్ సభ కార్యకలాపాలకు తీవ్ర అంతరాయం కలిగింది.

రాహుల్ గాంధీ ప్రసంగిస్తున్న సమయంలో అధికార పార్టీ సభ్యులు అభ్యంతరం వ్యక్తం చేశారు. దీంతో విపక్ష సభ్యుల్లో నుంచి ఒకరు ప్యానెల్ స్పీకర్ తెన్నేటి కృష్ణప్రసాద్‌ను ఉద్దేశించి 'యార్' అని సంభోదించారు.

ఇలా 'యార్' అనడం ఏమిటి... ఇది పార్లమెంట్... సభాపతి స్థానంలో ఉన్న వ్యక్తిని అలా సంభోదించడం సరికాదని ప్యానెల్ స్పీకర్ మందలించారు. అలా మాట్లాడటం సభా మర్యాదకు వ్యతిరేకమని తెలిపారు. వెంటనే మీ మాటలను వెనక్కి తీసుకోవాలని సూచించారు.