కేతిరెడ్డి పెద్దారెడ్డికి హైకోర్టులో షాక్.. తాడిపత్రి వెళ్లేందుకు సింగిల్ జడ్జి ఇచ్చిన ఉత్తర్వులు రద్దు!
- తాడిపత్రి వెళ్లేందుకు భద్రత కల్పించాలన్న ఉత్తర్వులు రద్దు
- సింగిల్ జడ్జి ఆదేశాలను సస్పెండ్ చేసిన డివిజన్ బెంచ్
- కేతిరెడ్డి వస్తే శాంతిభద్రతల సమస్య తలెత్తుతుందని పోలీసుల వాదన
వివరాల్లోకి వెళితే, కేతిరెడ్డి పెద్దారెడ్డి తాడిపత్రి పర్యటనకు భద్రత కల్పించాలని ఇటీవల హైకోర్టు సింగిల్ జడ్జి పోలీసులను ఆదేశించారు. ఈ తీర్పును సవాలు చేస్తూ అనంతపురం ఎస్పీ జగదీశ్ హైకోర్టు డివిజన్ బెంచ్ను ఆశ్రయించారు. పెద్దారెడ్డి తాడిపత్రికి వస్తే శాంతిభద్రతలకు తీవ్ర విఘాతం కలిగే అవకాశం ఉందని పిటిషనర్ తరఫు న్యాయవాది ధర్మాసనం దృష్టికి తీసుకెళ్లారు.
పోలీసుల వాదనలతో ఏకీభవించిన డివిజన్ బెంచ్, సింగిల్ జడ్జి ఇచ్చిన ఉత్తర్వులను సస్పెండ్ చేసింది. ఈ వ్యవహారంపై వివరణ ఇవ్వాల్సిందిగా కేతిరెడ్డి పెద్దారెడ్డికి నోటీసులు జారీ చేసింది. దీంతో ప్రస్తుతానికి ఆయన తాడిపత్రి వెళ్లేందుకు వీలు లేకుండా పోయింది. ఈ కేసుపై తదుపరి విచారణను మూడు వారాల తర్వాత చేపట్టనున్నట్లు ధర్మాసనం స్పష్టం చేసింది.
