కోల్ కతా అత్యాచారంపై ఆర్జీకర్ బాధితురాలి తండ్రి ఏమన్నారంటే..?

"పశ్చిమ బెంగాల్‌లో మహిళలపై అఘాయిత్యాలు ఆగడం లేదు. నా కుమార్తెలా ఇంకెంతమంది ప్రభుత్వ నిర్లక్ష్యానికి బలికావాలి?" అంటూ గతంలో కోల్‌కతాలోని ఆర్జీకర్ వైద్య కళాశాలలో హత్యాచారానికి గురైన విద్యార్థిని తండ్రి తీవ్ర ఆవేదన వ్యక్తం చేశారు. కోల్‌కతాలోని ఓ న్యాయ కళాశాల ప్రాంగణంలో 24 ఏళ్ల విద్యార్థినిపై సామూహిక అత్యాచారం జరిగిన ఘటనపై ఆయన స్పందించారు. తన కుమార్తె విషయంలో వేలాది మంది రోడ్లపైకి వచ్చి పోరాడినా, పరిస్థితుల్లో మార్పు రాకపోవడంపై ఆయన కన్నీటిపర్యంతమయ్యారు.

"రాష్ట్రంలో పదేపదే ఇలాంటి దారుణాలు జరుగుతున్నాయంటే అది తృణమూల్ కాంగ్రెస్ (టీఎంసీ) ప్రభుత్వ ఉదాసీనతే కారణం" అని ఆయన ఆరోపించారు. తాజా ఘటనలోనూ నిందితులు అధికార పార్టీకి చెందినవారేనని ఆయన విమర్శించారు. లా విద్యార్థినిపై అఘాయిత్యానికి పాల్పడిన ముగ్గురు నిందితులకు కఠిన శిక్ష విధిస్తేనే భవిష్యత్తులో ఇలాంటివి పునరావృతం కావని ఆయన డిమాండ్ చేశారు.