అప్పలసూరి కాస్ట్యూమ్స్ లో జగపతిబాబును ఎవరూ గుర్తుపట్టలేకపోయారు!
- `పెద్ది` సినిమా గెటప్లో రోడ్డుపై నడిచిన జగపతిబాబు
- అప్పలసూరి పాత్రలో తనను ఎవరూ గుర్తించలేదని వెల్లడి
- 'రోడ్డున పడినా గుర్తుపట్టలేదు' అంటూ సోషల్ మీడియాలో వీడియో పోస్ట్
- ఈ పాత్ర కోసం భారీ ప్రోస్థటిక్ మేకప్ వేసుకున్న జగ్గూభాయ్
నిన్న తన 'ఎక్స్' ఖాతాలో జగపతిబాబు ఒక వీడియోను పోస్ట్ చేశారు. అందులో ఆయన 'పెద్ది' చిత్రంలోని తన పాత్ర 'అప్పలసూరి' గెటప్లో ఉన్నారు. భారీ ప్రోస్థటిక్ మేకప్, తెల్ల జుట్టు, పగిలిన కళ్లద్దాలు, పాతబడిన దుస్తులతో ఉన్న ఆయన, సాధారణ వ్యక్తిలా రోడ్డుపై నడుచుకుంటూ వెళ్లారు. అయినా ఆయన్ను ఎవరూ గుర్తించలేదు. ఈ వీడియోకు, “అప్పలసూరి రోడ్డున పడినా కూడా ఎవరూ గుర్తుపట్టలేదు” అని ఆయన క్యాప్షన్ జోడించారు.
బుచ్చిబాబు సానా దర్శకత్వం వహించిన 'పెద్ది' ఒక గ్రామీణ స్పోర్ట్స్ యాక్షన్ డ్రామా. ఇందులో జగపతిబాబు పోషించిన అప్పలసూరి పాత్ర తన కెరీర్లోనే ఎంతో గుర్తుండిపోతుందని ఆయన పేర్కొన్నారు. ఈ విలక్షణమైన రూపాన్ని తీర్చిదిద్దిన దర్శకుడు బుచ్చిబాబు, జాతీయ అవార్డు గ్రహీత, మేకప్ ఆర్టిస్ట్ రషీద్లను ఆయన ప్రశంసించారు. షూటింగ్ సమయంలో కూడా ఈ గెటప్ను పరీక్షించేందుకు జగపతిబాబు ఓ టీ కొట్టుకు వెళ్లారని, అక్కడ కూడా తనను ఎవరూ గుర్తించలేదని సమాచారం.
1980ల నాటి గ్రామీణ ఆంధ్రప్రదేశ్ నేపథ్యంలో సాగే ఈ చిత్రంలో జాన్వీ కపూర్, శివ రాజ్కుమార్, దివ్యేందు, బోమన్ ఇరానీ వంటి ప్రముఖులు నటించారు. మైత్రీ మూవీ మేకర్స్ నిర్మించిన ఈ చిత్రానికి ఏ.ఆర్. రెహమాన్ సంగీతం అందించారు. సినిమా విడుదల రోజున జగపతిబాబు పంచుకున్న ఈ వీడియో, ఆయన పాత్రపై ప్రేక్షకుల్లో మరింత ఆసక్తిని పెంచుతోంది.
