కాంగ్రెస్, బీఆర్ఎస్ మధ్య బ్యాగ్ పంచాయితీ.. సోషల్ మీడియాలో రచ్చ

తెలంగాణలో ఫార్ములా ఈ రేసు వ్యవహారంతో రాజకీయాలు వేడెక్కాయి. ఈ కేసులో మాజీ మంత్రి, బీఆర్ఎస్ వర్కింగ్ ప్రెసిడెంట్ కేటీఆర్ ను ఏసీబీ విచారించిన విషయం తెలిసిందే. కేటీఆర్ అరెస్టు తప్పదనే ప్రచారం కూడా జరుగుతోంది. ఈ నేపథ్యంలో బీఆర్ఎస్ పార్టీ చేసిన ట్వీట్ వైరల్ గా మారింది. ‘ఏసీబీ ఆఫీసులో పదేళ్లుగా ఓ నల్ల బ్యాగు పడి ఉంది. ఎవరిదో చెప్పుకోండి’ అంటూ ఓ బ్యాగు ఫొటోతో బీఆర్ఎస్ పార్టీ తన అధికారిక ట్విట్టర్ హ్యాండిల్ లో ఓ పోస్టు పెట్టింది. ఓటుకు నోటు కేసును పరోక్షంగా ప్రస్తావిస్తూ చేసిన ఈ ట్వీట్ కు కాంగ్రెస్ పార్టీ వెంటనే కౌంటర్ ఇచ్చింది. ‘ఆ బ్యాగును చూసి కేటీఆర్ తెల్లమొహం వేశాడా.. ఆ బ్యాగులోనే 2014 నుంచి మీరు (బీఆర్ఎస్ నాయకులు) చేసిన అవినీతి చిట్టా ఉంది’ అంటూ బీఆర్ఎస్ పార్టీ ట్వీట్ ను రీట్వీట్ చేసింది.

‘‘ఫార్ములా ఈ కార్ రేస్ స్కాం, ఔటర్ రింగు రోడ్డు దోపిడీ, కాళేశ్వరం స్కాం, అక్రమ ఫోన్ ట్యాపింగ్, విద్యుత్ కొనుగోళ్లలో అవకతవకలు, ప్రభుత్వ భూముల అక్రమ అమ్మకాలు, కవిత లిక్కర్ స్కాం, ధరణి పోర్టల్ తో చేసిన భూ దోపిడీ, స్కీంల పేరుతో చేసిన స్కాంలు, గొర్రెల స్కాం, సర్పంచ్ లకు ఎగ్గొట్టిన బిల్లులు, మీరు చేసిన 7 లక్షల కోట్ల అప్పుల వివరాలు, దళితులపై మీ దౌర్జన్యాలు.. ఇవే కాదు ఇంకా చాలా ఉన్నాయి. మీ బీఆర్ఎస్ దోపిడీ దొంగల అవినీతి వివరాలను నింపడానికి ఆ ఒక్క బ్యాగు సరిపోదు, ఇంకా చాలా బ్యాగులను నింపాల్సి ఉంది. కేటీఆర్ విచారణకు వెళ్ళిన ప్రతిసారి బ్యాగులను లెక్కించమని చెప్పండి’’ అంటూ కాంగ్రెస్ పార్టీ బీఆర్ఎస్ నేతలకు కౌంటర్ ఇచ్చింది.