శాకుంతలం.. డబ్బులు రాకపోయినా.. అవార్డులొచ్చాయ్!

టాలీవుడ్ స్టార్ హీరోయిన్ సమంత, మలయాళ నటుడు దేవ్ మోహన్ ప్రధాన పాత్రల్లో నటించిన చిత్రం ‘శాకుంతలం’. గుణశేఖర్‌ దర్శకత్వంలో భారీ బడ్జెట్‌తో తెరకెక్కిన ఈ సినిమా బాక్సాఫీస్ వద్ద బోల్తా పడింది. ఎన్నో అంచనాల మధ్య ఏప్రిల్‌ 14న విడుదలై.. కనీస వసూళ్లను కూడా రాబట్టుకోలేకపోయింది. అభిమానులను మెప్పించలేకపోయిన ఈ సినిమాకు అవార్డులు మాత్రం బాగానే వస్తున్నాయి.

శాకుంతలం సినిమాకు గతంలో న్యూయార్క్ ఇంట‌ర్నేష‌న‌ల్ ఫిల్మ్స్ అవార్డ్స్- 2023లో బెస్ట్ ఫాంట‌సీ ఫిల్మ్‌గా, బెస్ట్ మ్యూజిక‌ల్ ఫిల్మ్‌గా అవార్డులు వచ్చాయి. తాజాగా ఫ్రాన్స్‌లో జరుగుతున్న కేన్స్ వరల్డ్ ఫిల్మ్ ఫెస్టివల్‌లోనూ అవార్డులను కొల్లగొట్టింది. ఈ సినిమాకు నాలుగు విభాగాల్లో అవార్డులు దక్కాయి.

బెస్ట్ ఫారిన్ ఫిల్మ్, బెస్ట్ ఫాంటసీ ఫిల్మ్, బెస్ట్ కాస్ట్యూమ్ డిజైన్, బెస్ట్ ఇండియన్ ఫిల్మ్ కేటగిరీల్లో శాకుంతలం సత్తా చాటింది. ఈ విషయాన్ని గుణటీమ్ వర్క్స్ తమ ఇన్ స్టా గ్రామ్, ట్విట్టర్ ఖాతాల్లో షేర్ చేసింది. కాగా, థియేట‌ర్ల‌లో రిలీజై నెల రోజులు కూడా కాక‌ముందే శాకుంతలం సినిమా ఓటీటీలోకి వ‌చ్చేసిన సంగతి తెలిసిందే.