హాలిడేకు భర్తతో కలిసి గోవా వచ్చిన బ్రిటన్ మహిళపై అత్యాచారం

హాలీడే కోసం భర్తతో కలిసి గోవా వచ్చిన బ్రిటిష్ మహిళపై అత్యాచారం జరిగింది. ఈ ఘటనతో సంబంధం ఉన్న 32 ఏళ్ల నిందితుడిని పోలీసులు అరెస్ట్ చేశారు. పోలీసుల కథనం ప్రకారం.. భర్తతో కలిసి విహారయాత్ర కోసం గోవా వచ్చిన మధ్య వయస్కురాలైన మహిళ ఈ నెల 2న అరంబోల్ స్వీట్ వాటర్ బీచ్ వద్ద సేద తీరుతోంది. ఈ క్రమంలో స్థానికంగా నివాసముండే నిందితుడు ఆమెపై అత్యాచారానికి పాల్పడ్డాడు. 

బాధిత మహిళ నిన్న పోలీసులకు ఫిర్యాదు చేసింది. కేసు నమోదు చేసుకున్న పోలీసులు రంగంలోకి దిగారు. నిందితుడిని నిన్ననే అరెస్ట్ చేశారు. కేసును దర్యాప్తు చేస్తున్నామని, త్వరలోనే ఈ ఘటనకు సంబంధించి మరిన్ని వివరాలు వెల్లడిస్తామని పోలీసులు తెలిపారు.